തൊടുപുഴ: സംസ്ഥാനത്തെ അണക്കെട്ടുകളിലെ ജലശേഖരം പ്രളയ വര്‍ഷങ്ങളിലെ സെപ്റ്റംബറിനേക്കാള്‍ ഉയര്‍ന്ന നിലയില്‍. ഇന്നലത്തെ കണക്കുപ്രകാരം 3,452.668 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളം എല്ലാ അണക്കെട്ടുകളിലുമായുണ്ട്. ഇത് മൊത്തം സംഭരണശേഷിയുടെ 83.4 ശതമാനമാണ്.
മഹാപ്രളയമുണ്ടായ 2018ലെ സെപ്റ്റംബര്‍ 25ന് 81 ശതമാനമായിരുന്നു ജലശേഖരം. കഴിഞ്ഞ വര്‍ഷം ഇതേസമയം 2,977.85 ദശലക്ഷം യൂനിറ്റിനുള്ള വെള്ളമാണുണ്ടായിരുന്നത്. സംഭരണശേഷിയുടെ 72 ശതമാനം. 2017ല്‍ 65 ശതമാനവും 2016ല്‍ 53 ശതമാനവുമായിരുന്നു ഇതേസമയത്തെ ജലനിരപ്പ്. ഈ സീസണിലെ കഴിഞ്ഞ ഏഴു വര്‍ഷത്തെ ഉയര്‍ന്ന ജലനിരപ്പാണിപ്പോള്‍.
4,140.252 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളമാണ് സംസ്ഥാനത്തെ മൊത്തം സംഭരണശേഷി. ഇതില്‍ 2,190 ദശലക്ഷം യൂനിറ്റിനുള്ള വെള്ളം സംഭരിക്കാവുന്നത് ഇടുക്കി അണക്കെട്ടിലാണ്. ഇന്നലെ വൈകീട്ട് നാലു മണിയിലെ കണക്കുപ്രകാരം ഇടുക്കി അണക്കെട്ടിലെ ജലനിരപ്പ് 2,387.68 അടിയാണ്. ജലനിരപ്പ് 0.3 അടി കൂടി ഉയര്‍ന്നാല്‍ അണക്കെട്ട് തുറക്കുന്നതിനുള്ള ആദ്യ മുന്നറിയിപ്പായ ബ്ലൂ അലര്‍ട്ട് നല്‍കും. സംഭരണശേഷിയുടെ 87.17 ശതമാനം വെള്ളം (ഗ്രോസ് സ്റ്റോറേജ്) ഇപ്പോള്‍ അണക്കെട്ടിലുണ്ട്. 82.44 ശതമാനമാണ് ലൈവ് സ്റ്റോറേജ് (വൈദ്യുതി ഉല്‍പാദിപ്പിക്കാവുന്ന വെള്ളം).
സെപ്റ്റംബര്‍ ഒന്നു മുതല്‍ ഇന്നലെ വരെ 721.6 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളമാണ് അണക്കെട്ടുകളിലേക്ക് പ്രതീക്ഷിച്ചിരുന്നത്. എന്നാല്‍ 1,227. 243 ദശലക്ഷം യൂനിറ്റിനുള്ള വെള്ളം ഒഴുകിയെത്തി.
സെപ്റ്റംബര്‍ ഒന്നു മുതല്‍ 30 വരെ പ്രതീക്ഷിച്ചിരുന്നത് 902 ദശലക്ഷം യൂനിറ്റിനുള്ള നീരൊഴുക്കാണ്. ഇന്നലെ മുതല്‍ അണക്കെട്ടുകളുടെ വൃഷ്ടിപ്രദേശങ്ങളില്‍ മഴ കുറഞ്ഞെങ്കിലും നീരൊഴുക്ക് ശക്തമായി തുടരുന്നുണ്ട്.
കേന്ദ്ര കാലാവസ്ഥ വകുപ്പിന്റെ കണക്കു പ്രകാരം കണ്ണൂര്‍, കാസര്‍കോട്, കോട്ടയം, കോഴിക്കോട്, തിരുവനന്തപുരം ജില്ലകളില്‍ ഈ കാലവര്‍ഷത്തില്‍ അധികമഴ ലഭിച്ചു. മറ്റു ജില്ലകളില്‍ സാധാരണ മഴയും. കേരളത്തില്‍ ഒരിടത്തും മഴക്കുറവില്ല.