കൊട്ടാരക്കര:  കൃത്യമായ പരിശോധനകളില്ലാതായതോടെ  കൊട്ടാരക്കരയിലെയും പരിസരപ്രദേശങ്ങളിലെയും ഹോട്ടലുകളുടെയും ബേക്കറികളുടെയും   പ്രവര്‍ത്തനം മാരക രോഗങ്ങളിലേക്ക് നയിക്കുംവിധമായി. മിക്കയിടത്തും വൃത്തിഹീനമായ സാഹചര്യത്തിലാണ് ഭക്ഷണം പാകം ചെയ്യുന്നത്.പഴകിയയിനങ്ങള്‍ കച്ചവടം ചെയ്യുന്നവരും കുറവല്ല. പലയിടത്തു നിന്നും പരാതികള്‍ ഉയര്‍ന്നിട്ടും പരിശോധനകളൊന്നും നടക്കുന്നില്ല.
ഭക്ഷ്യസുരക്ഷാ വിഭാഗം,  താലൂക്ക് സപ്ലൈവിഭാഗം, ആരോഗ്യ സുരക്ഷാ വിഭാഗം തുടങ്ങിയ വകുപ്പുകള്‍ക്കാണ് പരിശോധന നടത്തേണ്ട ചുമതലയുള്ളത്.
ജില്ലയുടെ  കിഴക്കന്‍ മേഖലയിലെ പ്രധാനപട്ടണമാണ് കൊട്ടാരക്കര.  ഇവിടെ മൂന്ന് കിലോമീറ്റര്‍ ചുറ്റളവില്‍ അന്‍പതോളം ഹോട്ടലുകളും അറുപതോളം ബേക്കറികളും മുപ്പതോളം തട്ടുകടകളും മറ്റുപലഹാര നിര്‍മാണ യൂനിറ്റുകളും പ്രവര്‍ത്തിക്കുന്നുണ്ട്. ഇവിടെ തന്നെയായി മത്സ്യമാര്‍ക്കറ്റും പ്രവര്‍ത്തിക്കുന്നുണ്ട്. ഇവിടെയെവിടെയും  ഗുണനിലവാര പരിശോധനകള്‍ നടക്കുന്നില്ലെന്ന പരാതി വ്യാപകമാണ്.
കഴിഞ്ഞ ആറ് മാസക്കാലമായി ഹോട്ടലുകളിലും ബേക്കറികളിലും ആഹാരനിര്‍മ്മാണ യൂനിറ്റുകളിലും  കാര്യമായ പരിശോധനകളൊന്നും നടന്നിട്ടില്ല.  
കഴിഞ്ഞ ക്രിസ്മസ്, ന്യൂഇയര്‍ സമയത്ത് കൊട്ടാരക്കര ടൗണില്‍ താലൂക്ക് സപ്ലൈവിഭാഗം പരിശോധന നടത്തുകയും  വൃത്തിഹീനമായ സാഹചര്യത്തില്‍ പ്രവര്‍ത്തിച്ചിരുന്ന ചില സ്ഥാപനങ്ങള്‍ അടപ്പിച്ചിരുന്നു. പിഴയടച്ചതിനു ശേഷമാണ് ഈ സ്ഥാപനങ്ങള്‍ പിന്നീട് തുറന്നത്. എന്നാല്‍ ഇവടെ പോലും തുടര്‍പരിശോധനകളുണ്ടായില്ല. ഹോട്ടല്‍ ആന്റ് ബേക്കേഴ്‌സ് അസോസിയേഷനുകളുടെ സമ്മര്‍ദമാണ് ഇതിനുപിന്നിലെന്ന് ആക്ഷേപം ഉയര്‍ന്നിട്ടുണ്ട്.  
ടൗണില്‍ രാത്രി ഏറെ വൈകിയും പ്രവര്‍ത്തിക്കുന്ന തട്ടുകടകളുണ്ട്.  ഇവിടെ വൃത്തിഹീനമായ സാഹചര്യത്തിലാണ് പാചകം ചെയ്യുന്നത്. മേഖലയില്‍ പ്രവര്‍ത്തിക്കുന്ന  ഇന്‍സ്റ്റെന്റ് ചപ്പാത്തി നിര്‍മാണ യൂനിറ്റുകള്‍ക്ക്  ലൈസന്‍സുണ്ടോയെന്നു പോലും ആര്‍ക്കും അറിയില്ല. ഹോട്ടലുകളിലെ വില നിലവാരം ഏകീകൃതമാക്കാനും നടപടി ഉണ്ടായിട്ടില്ല .ഇതിനായി കൊട്ടാരക്കര നഗരസഭ ഇടപെടുന്നില്ലെന്ന പരാതിയും ഉയര്‍ന്നിട്ടുണ്ട്.
കൊട്ടാരക്കര മത്സ്യമാര്‍ക്കറ്റിനു  സമീപത്താണ് ഭക്ഷ്യസുരക്ഷാ വകുപ്പിന്റെ ഓഫിസ്.  പഴയതുമായ മത്സ്യമാംസാദികള്‍   ഇവിടെ വിറ്റഴിക്കുന്നതായി പരാതി ഉയര്‍ന്നിട്ടും വകുപ്പധികൃതര്‍ക്ക് അനക്കമില്ല.