കണ്ണൂര്‍: പ്രളയക്കെടുതിയുടെ ശരിയായ കാരണം പ്രകൃതിയെ നശിപ്പിച്ചതാണെന്നു ചൂണ്ടിക്കാട്ടി മുഖ്യമന്ത്രിക്ക് കോട്ടക്കുന്ന് ബൈപാസ് കുടിയിറക്കുവിരുദ്ധ സമരസമിതിയുടെ തുറന്നകത്ത്.
കോര്‍പറേറ്റ് വമ്പന്‍മാരുടെ താല്‍പര്യ സംരക്ഷണമാണ് വന്‍കിട വികസന പ്രവര്‍ത്തനങ്ങളിലെല്ലാം പരിഗണിക്കപ്പെട്ടതെന്നും ഈ വികസന പ്രവര്‍ത്തനങ്ങളുടെ മറ്റൊരു മുഖമാണ് ഇന്ന് നടപ്പിലാക്കിക്കൊണ്ടിരിക്കുന്ന ദേശീയപാതാ വികസനമെന്നും കത്തില്‍ ചൂണ്ടിക്കാട്ടുന്നു. വന്‍ കുന്നുകള്‍, പരന്നു കിടക്കുന്ന നെല്‍പാടങ്ങള്‍, തണ്ണീര്‍തടങ്ങള്‍, കണ്ടല്‍ കാടുകള്‍ ഇവയൊക്കെ നശിപ്പിച്ചാണ് ദേശീയ പാതയുടെ ബൈപാസ്സുകള്‍ ഉണ്ടാക്കാന്‍ പോകുന്നത്. 30 മീറ്ററില്‍ ആറു വരിപ്പാത ഭംഗിയായി ഉണ്ടാക്കാന്‍ കഴിയും എന്ന് സര്‍വകക്ഷി യോഗം തീരുമാനിച്ചതിന്‍ ശേഷമാണ് ബി.ഒ.ടി താല്‍പര്യങ്ങള്‍ക്ക് വിധേയമായി 45 മീറ്ററാക്കി ഉയര്‍ത്തിയത്. ഇങ്ങനെ പണിയുന്ന റോഡുകള്‍ പ്രകൃതിക്ക് ഏല്‍പിക്കുന്ന ആഘാതം മറ്റൊരു ദുരന്തത്തിന് കൂടി വഴിയൊരുക്കുമെന്നതിനാല്‍ സര്‍ക്കാര്‍ ഒരു പുനര്‍ വിചിന്തനം നടത്തണമെന്നും സമരസമിതി ആവശ്യപ്പെടുന്നു.
പ്രകൃതിയെ തകിടം മറിച്ചും, പതിനായിരങ്ങളെ വഴിയാധാരമാക്കിയുമുള്ള കുത്തക താല്‍പര്യ പൂര്‍ത്തീകരണത്തിനായുള്ള വികസനം നിര്‍ത്തി വെക്കണം. 30 മീറ്ററില്‍ സ്ഥലമെടുത്ത് ഇരകള്‍ക്ക് മതിയായ പുനരധിവാസവും നഷ്ടപരിഹാരവും നല്‍കിയാണ് വികസനം നടത്തേണ്ടതെന്നും സമരസമിതി ജനറല്‍ കണ്‍വീനനര്‍ എന്‍.എം കോയയുടെ പേരിലുള്ള കത്തില്‍ ആവശ്യപ്പെടുന്നു.