പാനൂര്‍: പാനൂരിലെ പരിസ്ഥിതി പഠനകേന്ദ്രം അവഗണനയുടെ പടുകുഴിയില്‍. പി.ആര്‍ കുറുപ്പ് വനം മന്ത്രിയായിരിക്കെ 2001ലാണ് പൊയിലൂര്‍ മുത്തപ്പന്‍ മഠപ്പുരയ്ക്ക് സമീപം പരിസ്ഥിതി പഠനകേന്ദ്രം ആരംഭിച്ചത്. തുടക്കത്തില്‍ നല്ലരീതിയില്‍ പ്രവര്‍ത്തിച്ച കേന്ദ്രം ഇന്ന് ആര്‍ക്കും വേണ്ടാത്ത നിലയിലാണ്.
പശ്ചിമഘട്ട മലനിരകളിലെ അപൂര്‍വ സസ്യങ്ങളെക്കുറിച്ചും ഔഷധ സസ്യങ്ങളെക്കുറിച്ചുമുള്ള ഗവേഷണവും പരിസ്ഥിതി പഠനവും നടത്തുക, വിദ്യാര്‍ഥികളില്‍ പരിസ്ഥിതി അവബോധമുണ്ടാക്കുക, കാടുമായും അപൂര്‍വ സസ്യജാലങ്ങളുമായും അടുപ്പമുണ്ടാക്കാനുള്ള സാഹചര്യമൊരുക്കുക, റസിഡന്‍ഷ്യല്‍ ക്ലാസുകളും വനയാത്രകളും സെമിനാറുകളും സംഘടിപ്പിക്കുക തുടങ്ങിയ ലക്ഷ്യങ്ങളോടെയായിരുന്നു പഠനകേന്ദ്രം ആരംഭിച്ചത്.
പി.ആര്‍ കുറുപ്പിന്റെ മരണശേഷം അദ്ദേഹത്തിന്റെ സ്മരണയ്ക്കായി പി.ആര്‍ കുറുപ്പ് സ്മാരക പരിസ്ഥിതി പഠനകേന്ദ്രം എന്ന് പുനര്‍നാമകരണം ചെയ്തിരുന്നു. പത്തു വര്‍ഷത്തിലേറെയായി അടച്ചിട്ടിരിക്കുന്ന ഈ സ്ഥാപനം ഇന്ന് സാമൂഹിക വിരുദ്ധരുടെ നിത്യസങ്കേതമായിരിക്കുകയാണ്.
വാഴമല ടൂറിസം പദ്ധതി പുരോഗമിക്കാത്തതും മാറിവരുന്ന സര്‍ക്കാരുകളുടെ രാഷ്ട്രീയ താത്പര്യങ്ങളും പഠനകേന്ദ്രത്തിന്റെ നാശത്തിന് ആക്കം കൂട്ടിയതായി സ്ഥാപനസുരക്ഷാ ചുമതല വഹിച്ചിരുന്ന വട്ടപ്പറമ്പത്ത് ചന്ദ്രന്‍ പറയുന്നു.
കാടുമൂടിക്കിടക്കുന്ന പ്രദേശത്ത് ഒരു പരിസ്ഥിതി പഠനകേന്ദ്രം ഉണ്ടെന്ന് മനസിലാകുന്നതുതന്നെ പഴകി ദ്രവിക്കാറായ ബോര്‍ഡുള്ളതുകൊണ്ടാണ്. പ്രളയവും ഉരുള്‍പൊട്ടലും ഉള്‍പ്പെടെയുള്ള പ്രകൃതിദുരന്തങ്ങള്‍ കേരളത്തില്‍ പതിവാകുമ്പോഴും പരിസ്ഥിതിയുമായി ബന്ധപ്പെട്ട ഈ സുപ്രധാന പഠനകേന്ദ്രം പുനരുജ്ജീവിപ്പിക്കാത്തത് കുറ്റകരമായ അനാസ്ഥയാണെന്നും അടിയന്തരമായി പഠനകേന്ദ്രം പ്രവര്‍ത്തനം ആരംഭിക്കണമെന്നുമാണ് നാട്ടുകാര്‍ ആവശ്യപ്പെടുന്നത്.