പാലക്കാട്:പ്രളയക്കെടുതിയില്‍പ്പെട്ട കുടുംബങ്ങളുടെ വീടും ചുറ്റുപാടുകളും തിരിച്ചുപിടിക്കാന്‍ ക്ലീനിങ് ചെങ്ങന്നൂര്‍ ദൗത്യവുമായി പാലക്കാട് കുടുംബശ്രീയും. കുടുംബശ്രീ പാലക്കാട് ജില്ലാ മിഷന്റെ നേതൃത്വത്തില്‍ സന്നദ്ധ പ്രവര്‍ത്തകരുടെ സംഘമാണ് ചെങ്ങന്നൂരിലെത്തിയത്. കുടുംബശ്രീയുമായി ബന്ധപ്പെട്ട് പാലക്കാട് ജില്ലയിലെ വിവിധ തലങ്ങളില്‍ പ്രവര്‍ത്തിക്കുന്ന ഉദ്യോഗസ്ഥരും കുടുംബശ്രീ പ്രവര്‍ത്തകരുമടങ്ങിയ 80 അംഗ സംഘമാണ് ചെങ്ങന്നൂരില്‍ ശുചീകരണ യത്‌നത്തില്‍ പങ്കാളികളായത്. വീടുകളില്‍ നിന്നും അജൈവ മാലിന്യങ്ങള്‍ ശേഖരിച്ച് വിവിധയിടങ്ങളിലായി നഗരസഭ തയ്യാറാക്കിയ കളക്ഷന്‍ പോയിന്റില്‍ എത്തിക്കുക, ചെളിയില്‍ മുങ്ങി പോയ വീടുകളും വീട്ടുപകരണങ്ങളും വൃത്തിയാക്കി ഉപയോഗയോഗ്യമാക്കുക, ചെളിയടിഞ്ഞു മൂടിപ്പോയ പൊതുവഴികള്‍ ഗതാഗത യോഗ്യമാക്കുക തുടങ്ങിയ നിരവധി പ്രവൃത്തികളുമായി പാലക്കാട് നിന്നെത്തിയ കുടുംബശ്രീ പ്രവര്‍ത്തകരെ നാട്ടുകാര്‍ ഏറെ സ്‌നേഹത്തോടെയാണ് വരവേറ്റത്. കുടുംബശ്രീ ജില്ലാ മിഷന്‍ കോഡിനേറ്റര്‍ പി.സൈതലവി, അസിസ്റ്റന്റ് മിഷന്‍ കോഡിനേറ്റര്‍മാരായ എസ്.വി.പ്രേംദാസ്, എം.ദിനേശ് എന്നിവരുടെ നേതൃത്വത്തില്‍ ജില്ലാ പ്രോഗ്രാം മാനേജര്‍മാര്‍, ബ്ലോക്ക് കോഡിനേറ്റര്‍മാര്‍, സി.ഡി.എസ് ചെയര്‍പേഴ്‌സന്‍മാര്‍, അകൗണ്ടന്റുമാര്‍, ക്ലറിക്കല്‍ ഉദ്യോസ്ഥര്‍, സ്‌നേഹിത ഹെല്‍പ്പ് സര്‍വ്വീസ് പ്രൊവൈഡര്‍മാര്‍, കാസ് ഓഡിറ്റര്‍മാര്‍, കമ്മ്യൂണിറ്റി കൗണ്‍സിലര്‍മാര്‍, എസ്.ടി ആനിമേറ്റര്‍മാര്‍ തുടങ്ങിയ കുടുംബശ്രീ പ്രവര്‍ത്തകരടങ്ങിയ 80 ഓളം സന്നദ്ധ പ്രവര്‍ത്തകരാണ് നവകേരള സൃഷ്ടിയ്ക്ക് കരുത്ത് പകര്‍ന്ന് ശുചീകരണ പ്രവര്‍ത്തികള്‍ക്കായി ചെങ്ങന്നൂരെത്തിയത്.
ചെങ്ങന്നൂര്‍ എം.എല്‍.എ സജി ചെറിയാന്‍, മറ്റ് ജനപ്രതിനിധികള്‍ എന്നിവര്‍ മാര്‍ഗ നിര്‍ദ്ദേശങ്ങളുമായി നേതൃത്വം നല്‍കി. ചെങ്ങന്നൂരിലെ ജനങ്ങളെ സഹായിക്കാനെത്തിയ പാലക്കാട് കുടുംബശ്രീ സംഘത്തോട് എം.എല്‍.എ പ്രത്യേകം നന്ദിയറിയിച്ചു.