ദുബൈ: ഐ.സി.സിയുടെ ആദ്യ വനിതാ മാച്ച് റഫറിയെന്ന ബഹുമതി സ്വന്തമാക്കി മുന്‍ ഇന്ത്യന്‍ ക്രിക്കറ്റ് താരമായിരുന്ന ജി.എസ് ലക്ഷ്മി. അംഗീകാരം ലഭിച്ചതോടെ അന്താരാഷ്ട്ര മത്സരങ്ങളില്‍ മാച്ച് റഫറിയാകാന്‍ ലക്ഷ്മിക്ക് സാധിക്കും. 2008-09 സീസണില്‍ വനിതകളുടെ മൂന്ന് ആഭ്യന്തര ക്രിക്കറ്റ് മത്സരം ലക്ഷ്മി നിയന്ത്രിച്ചിരുന്നു. ക്ലയര്‍ പൊളോസാക് എന്ന ആസ്‌ത്രേലിയന്‍ വനിതാ അമ്പയര്‍ ഈ മാസം ആദ്യം പുരുഷന്‍മാരുടെ മത്സരം നിയന്ത്രിച്ചതിന് പിന്നാലെയാണ് ഐ.സി.സിയുടെ മറ്റൊരു തീരുമാനം.

പൊളോസാക് ഉള്‍പ്പെടെ അമ്പയര്‍മാരുടെ ഡെവലപ്‌മെന്റ് പാനലില്‍ ഏഴു വനിതകളെ കൂടി ഉള്‍പ്പെടുത്തിയിട്ടു@ണ്ട്. ശിവാനി മിശ്ര, സുയെ റെഡ്‌ഫെന്‍, മേരി വാല്‍ഡ്രോണ്‍, എലോയ്‌സ് ഷെരിദന്‍, ലൗറന്‍ അഗെന്‍ബഗ്, കിം കോട്ടോണ്‍, ജാക്വിലിന്‍ വില്ല്യംസ് എന്നിവരാണ് പുതുതായി പട്ടികയില്‍ ഇടം നേടിയ വനിതാ അമ്പയര്‍മാര്‍. ലിംഗനീതിയുടെ മറ്റൊരു ചുവടുവയ്പാണിതെന്നാണ് ഐ.സി.സിയുടെ പ്രതികരണം.
ഭാവിയില്‍ കൂടുതല്‍ വനിതകള്‍ ഈ രംഗത്ത് എത്തുമെന്നാണ് പ്രതീക്ഷിക്കുന്നതെന്ന് ഐ.സി.സി വ്യക്തമാക്കി. അംഗീകാരം ലഭിച്ചതില്‍ സന്തോഷമുണ്ടെന്നും കൂടുതല്‍ വനിതകള്‍ ഇനിയും ഇത്തരം സ്ഥാനത്തേക്ക് എത്തട്ടെയെന്നും ലക്ഷ്മി പറഞ്ഞു.