തിരുവനന്തപുരം: കോട്ടയം ജില്ലാ പഞ്ചായത്ത് പ്രസിഡന്റ് തെരഞ്ഞെടുപ്പില്‍ കോണ്‍ഗ്രസ് തോറ്റതിന് സി.പി.ഐക്ക് അസ്വസ്ഥത എന്തിനെന്ന് സി.പി.എം മുഖപത്രമായ ദേശാഭിമാനി. കേരളാ കോണ്‍ഗ്രസ് (എം) സ്ഥാനാര്‍ഥിയെ പിന്തുണച്ചതിനെ പരസ്യമായി എതിര്‍ത്ത സി.പി.ഐയെ 'ഞങ്ങളുടെ സഹജീവി' എന്ന് വിശേഷിപ്പിച്ചുകൊണ്ട് രൂക്ഷമായാണ് മുഖപ്രസംഗം വിമര്‍ശിക്കുന്നത്.
കോണ്‍ഗ്രസിനുണ്ടായ പരാജയം ആ പാര്‍ട്ടിയെയും യു.ഡി.എഫിനെയും വിഷമിപ്പിക്കുന്നതില്‍ അത്ഭുതമില്ലെന്ന് മുഖപ്രസംഗം പറയുന്നു. പക്ഷെ, ഇത് ഞങ്ങളുടെ സഹജീവികള്‍ അടക്കമുള്ളവര്‍ക്ക് അസ്വസ്ഥത സൃഷ്ടിച്ചതായി കണ്ടു. കെ.പി.സി.സി ആസ്ഥാനമായ ഇന്ദിരാഭവനില്‍നിന്ന് ഉയര്‍ന്നതിനെക്കാള്‍ വലിയ വിലാപവും മുറവിളിയുമാണ് ഇത്തരം കേന്ദ്രങ്ങളില്‍നിന്ന് ഉണ്ടായത്. സി.പി.എം അംഗങ്ങള്‍ കേരളാ കോണ്‍ഗ്രസിലെ സഖറിയാസ് കുതിരവേലിക്ക് വോട്ട് ചെയ്തപ്പോള്‍ കോണ്‍ഗ്രസിന്റെ സണ്ണി പാമ്പാടി പരാജയപ്പെട്ടു. പ്രാദേശിക തെരഞ്ഞെടുപ്പിലുണ്ടായ ഈ പരാജയം യു.ഡി.എഫിനെ കൂടുതല്‍ ദുര്‍ബലപ്പെടുത്തുമെന്നതില്‍ ആര്‍ക്കും സംശയമുണ്ടാകാനിടയില്ല. ഈ സമീപനത്തോടെ കോട്ടയം ജില്ലയിലെ യു.ഡി.എഫ് സംവിധാനം ശിഥിലമാകുകയും ചെയ്തു.
കഴിഞ്ഞ തദ്ദേശ തെരഞ്ഞെടുപ്പില്‍ ഇടതു മുന്നണി ചര്‍ച്ച ചെയ്‌തെടുത്ത തീരുമാനങ്ങളില്‍ പ്രധാനപ്പെട്ട ഒന്ന് ഈ അവസരത്തില്‍ ഓര്‍മിക്കുന്നത് നന്ന്. യു.ഡി.എഫിനെയും ബി.ജെ.പിയെയും പരാജയപ്പെടുത്തുക എന്നതായിരുന്നു അത്. ഈ ലക്ഷ്യം മുന്‍നിര്‍ത്തി കോണ്‍ഗ്രസും ബി.ജെ.പിയും ഒഴികെയുള്ള വ്യക്തികളെയും സഹകരിക്കാവുന്ന ഗ്രൂപ്പുകളില്‍നിന്നുള്ളവരെയും സ്ഥാനാര്‍ഥികളാക്കാമെന്ന് തീരുമാനിച്ചിരുന്നു. അന്നത്തെ നിലപാടിലൂന്നിയ കാര്യമാണ് കോട്ടയത്തു കണ്ടത്.
പ്രസിഡന്റ് രാജിവച്ചതിനെത്തുടര്‍ന്ന് നടന്ന തെരഞ്ഞെടുപ്പില്‍ യു.ഡി.എഫ് ഒരുവശത്തും നേരത്തെ യു.ഡി.എഫിന്റെ ഭാഗമായിരുന്ന കേരളാ കോണ്‍ഗ്രസ് മറുവശത്തുമായി മത്സരിക്കാനിറങ്ങി. അവിടെ സി.പി.എമ്മിനോ ഇടതുമുന്നണിക്കോ ഭൂരിപക്ഷമില്ല. ഈ സാഹചര്യത്തില്‍ കോണ്‍ഗ്രസിനെ ജയിപ്പിക്കണോ എന്ന ചോദ്യമാണ് അവിടെ ഉയരുക. കോണ്‍ഗ്രസിനെ ജയിപ്പിക്കേണ്ട രാഷ്ട്രീയ ഉത്തരവാദിത്തം ഇടതുപക്ഷത്തിനുണ്ടോ എന്ന ചോദ്യവും പ്രസക്തം. ഇടതുമുന്നണി കഴിഞ്ഞ തദ്ദേശ തെരഞ്ഞെടുപ്പില്‍ കൈക്കൊണ്ട നിലപാട് നിഷേധിക്കേണ്ട സാഹചര്യം അവിടെ രൂപപ്പെടാത്തിടത്തോളം യു.ഡി.എഫിനെ പരാജയപ്പെടുത്തിയ നടപടി തെറ്റാണെന്ന് എങ്ങനെ ചിത്രീകരിക്കാനാകും. രാജ്യത്താകെ കോണ്‍ഗ്രസിനും സംഘ്പരിവാര്‍ നിയന്ത്രിക്കുന്ന ബി.ജെ.പിക്കുമെതിരേ സുചിന്തിതമായ നിലപാടാണ് സി.പി.എമ്മും സി.പി.ഐ ഉള്‍പ്പെടെയുള്ള മറ്റ് ഇടതു പാര്‍ട്ടികളും സ്വീകരിക്കുന്നത്. യു.ഡി.എഫിനെയും ബി.ജെ.പിയെയും ദുര്‍ബലപ്പെടുത്തുകയെന്ന നിലപാടിലൂന്നിയ സമീപനമാണ് കോട്ടയത്തുണ്ടായത്. അതിനെതിരേയാണ് വിവിധ കേന്ദ്രങ്ങളില്‍നിന്ന് ആക്ഷേപമുയര്‍ന്നത്.
കോട്ടയം മറയാക്കി സി.പി.എമ്മിനെതിരേ ഉയര്‍ത്തുന്ന ആക്ഷേപങ്ങള്‍ കോണ്‍ഗ്രസിന് ജയിക്കാനും കോണ്‍ഗ്രസിനെ ജയിപ്പിക്കാനുമുള്ള ശ്രമങ്ങള്‍ വിഫലമായതിന്റെ വികാരപ്രകടനങ്ങള്‍ മാത്രമായേ കാണാനാകൂ.
ഒരു പ്രാദേശിക തെരഞ്ഞെടുപ്പില്‍ കോണ്‍ഗ്രസ് തോറ്റുപോയതിന് ഇത്രയും ഒച്ചപ്പാട് ഉണ്ടാക്കേണ്ടതുണ്ടോ എന്ന് ആരെങ്കിലും സംശയിച്ചുപോയാല്‍ അവരെ കുറ്റപ്പെടുത്താനാകുമോ എന്നും മുഖപ്രസംഗം ചോദിക്കുന്നു.