വാഷിങ്ടണ്‍: അലാസ്‌കയിലെ കൂന്‍കോവിനു മുകളില്‍ രണ്ടു ജലവിമാനങ്ങള്‍ തകര്‍ന്നുവീണ് അഞ്ചുപേര്‍ മരിച്ചു. രണ്ടുപേരെ കാണാതായി. പത്തുപേരെ രക്ഷിച്ചു.

ഒരു പൈലറ്റും നാലു യാത്രക്കാരുമാണ് കൊല്ലപ്പെട്ടതെന്ന് യു.എസ് കോസ്റ്റ് ഗാര്‍ഡ് അറിയിച്ചു. ഇതിലൊരാള്‍ കാനേഡിയന്‍ പൗരനാണ്. കാണാതായ രണ്ടുപേര്‍ക്കു വേണ്ടി തിരച്ചില്‍ നടന്നുകൊണ്ടിരിക്കുകയാണ്. പരുക്കേറ്റവരില്‍ ഒരാളുടെ നിലഗുരുതരമാണ്.
അലാസ്‌കയുടെ തലസ്ഥാനമായ ജുനിയോയില്‍നിന്ന് 480 കി.മീ അകലെയുള്ള കൂന്‍കോവിലാണ് അപകടം നടന്നത്. കെച്ചിക്കനു സമീപമുള്ള രാജകീയ കപ്പലില്‍നിന്ന് യാത്രക്കാരെ കൊണ്ടുപോകുമ്പോഴാണ് ജലവിമാനങ്ങള്‍ തകര്‍ന്നുവീണതെന്ന് അധികൃതര്‍ അറിയിച്ചു.
അലാസ്‌കയിലെ പ്രശസ്തമായ കപ്പല്‍പാതകളുടെ ഇരുവശവും നിബിഡവനങ്ങളാണ്. ഇതു കാണാന്‍ ധാരാളം വിനോദസഞ്ചാരികളെത്തുന്നുണ്ട്. ഹെലികോപ്റ്ററുകളും ബോട്ടുകളും ചേര്‍ന്നാണ് രക്ഷാപ്രവര്‍ത്തനം നടത്തുന്നത്.
2015ല്‍ ഒരു തടാകത്തിനടുത്തെ പാറപ്രദേശത്ത് വിമാനം തകര്‍ന്ന് അതിലുണ്ടായിരുന്ന ഒമ്പതു പേര്‍ മരിച്ചിരുന്നു.