മിലാന്‍: നാപോളിയുടെ അര്‍ജന്റീന സ്‌ട്രൈക്കര്‍ ഗോണ്‍സാലോ ഹിഗ്വയ്ന്‍ സീരി എ ചാംപ്യന്‍മാരായ യുവന്റസിലേക്ക്. നാപോളിയില്‍ നിന്നു 94 കോടി യൂറോയ്ക്കാണ് യുവന്റസ് ഹിഗ്വയ്‌നെ ടീമിലെത്തിച്ചത്. രണ്ടു തവണകളായി തുക നല്‍കാമെന്ന കരാറിലാണ് നാപോളി, താരത്തെ ചാംപ്യന്‍ ടീമിനു കൈമാറിയത്. നാലു വര്‍ഷ കരാറിലാണ് ഹിഗ്വയ്ന്‍ യുവന്റസിനൊപ്പം ചേരുന്നത്. അടുത്ത ദിവസം തന്നെ ഹിഗ്വയ്ന്‍ യുവന്റസിന്റെ മെഡിക്കല്‍ പരിശോധനകള്‍ക്ക് വിധേയനാകും.

പോള്‍ പോഗ്ബയെ മാഞ്ചസ്റ്റര്‍ യുനൈറ്റഡിനു നല്‍കി ലോകം കണ്ട ഏറ്റവും വലിയ താരക്കൈമാറ്റത്തിനായി യുവന്റസ് ഒരുങ്ങുന്നതായുള്ള റിപ്പോര്‍ട്ടുകള്‍ക്കിടെയാണ് ഹിഗ്വയ്ന്‍ ടീമിലേക്കെത്തുന്നത്. കഴിഞ്ഞ സീസണില്‍ നാപോളിക്കായി 35 മത്സരങ്ങളില്‍ നിന്നു 36 ഗോളുകള്‍ അടിച്ചുകൂട്ടി 87 വര്‍ഷം പഴക്കമുള്ള സീരി എ റെക്കോര്‍ഡിനൊപ്പമെത്തിയ താരമാണ് ഹിഗ്വയ്ന്‍.

ആഴ്‌സണല്‍ അര്‍ജന്റൈന്‍ താരത്തെ സ്വന്തമാക്കാനുള്ള ശ്രമം നടത്തുന്നതിനിടെയാണ് അപ്രതീക്ഷിതമായി യുവന്റസ് മുന്‍ റയല്‍ മാഡ്രിഡ് താരം കൂടിയായ ഹിഗ്വയ്‌നെ സ്വന്തം പളയത്തിലെത്തിച്ചത്.