വടകര: വിദേശത്തേക്ക് കടത്താന്‍ കൊണ്ടുവരികയായിരുന്ന രണ്ടു കിലോ കഞ്ചാവുമായി മൂന്നുപേര്‍ അറസ്റ്റിലായി. കാസര്‍കോട് കാഞ്ഞങ്ങാട് മടിക്കൈ അരയിവട്ടത്തോട് മുനീര്‍ (37), കാഞ്ഞങ്ങാട് കരിവളം പടന്നക്കാട് ഒഴിഞ്ഞവളപ്പില്‍ സക്കീന മന്‍സിലില്‍ സിദ്ദിഖ് (26), പെരിയയിലെ കുണിയയില്‍ വാടക ക്വാട്ടേഴ്‌സില്‍ താമസക്കാരനായ കണ്ണൂര്‍ ഇരിക്കൂര്‍ പഴയംകോട് മുബാറക് മന്‍സില്‍ എം. മുസ്തഫ (57) എന്നിവരെയാണ് കോഴിക്കോട് റൂറല്‍ എസ്.പി ജെ. ജയ്‌ദേവിന് ലഭിച്ച രഹസ്യ വിവരത്തെ തുടര്‍ന്ന് വടകര സി.ഐ ടി. മധുസൂദനന്‍ നായരുടെ നേതൃത്വത്തിലുള്ള സ്‌ക്വാഡ് അറസ്റ്റ് ചെയ്തത്.

ദേശീയ പാതയിലെ പാലയാട്ട് നടയില്‍ വച്ച് വാഹന പരിശോധനക്കിടയിലാണ് കെ.എല്‍ 60 ജി 5430 ഹ്യൂണ്ടായ് ഐ 10 കാറില്‍ കടത്തുകയായിരുന്ന കഞ്ചാവുമായി പ്രതികള്‍ അറസ്റ്റിലാകുന്നത്.
ഖത്തറിലേക്ക് പോകാന്‍ കരിപ്പൂര്‍ എയര്‍പോര്‍ട്ടില്‍ എത്തിച്ചേരുന്ന യാത്രക്കാരന് കൈമാറാനുള്ളതായിരുന്നു കഞ്ചാവ്. വിദേശത്തേക്ക് മയക്കു മരുന്ന് കടത്തുന്ന ശൃംഖലയിലെ പ്രധാന കണ്ണികളാണ് പിടിക്കപ്പെട്ടവരെന്ന് പൊലിസ് പറഞ്ഞു. മലപ്പുറം സ്വദേശിയാണ് ഖത്തറിലെ ഇവരുടെ ഏജന്റ്. പിടിയിലായ മുസ്തഫ മൂന്ന് പ്രാവശ്യം ഖത്തറിലേക്ക് പോയതായി പൊലിസിന് തെളിവ് ലഭിച്ചിട്ടുണ്ട്. ഇയാളാണ് ചെറുപ്പക്കാരെ സംഘത്തിലേക്ക് റിക്രൂട്ട് ചെയ്യുന്നത്. ഇതിനായി പ്രത്യേക ഏജന്റുമാര്‍ പ്രവൃത്തിക്കുന്നുണ്ടെന്നും പൊലിസ് വ്യക്തമാക്കി. പ്രതികളെ ഇന്ന് കോടതിയില്‍ ഹാജരാക്കും.ആന്റി നാര്‍ക്കോട്ടിക് സ്‌ക്വാഡിന്റെ സ്‌പെഷല്‍ ഡ്രൈവിലാണ് പ്രതികള്‍ അറസ്റ്റിലായത്.