പറവൂര്‍: വിജയത്തിലേക്ക് എളുപ്പവഴികളില്ലെന്നും കഴിവുകള്‍ ശരിയായ രീതിയില്‍ പ്രയോജനപ്പെടുത്തി വിജയം കൈവരിക്കണമെന്നും മുന്‍ മുഖ്യമന്ത്രി ഉമ്മന്‍ചാണ്ടി വിദ്യാര്‍ഥികളോട് ആഹ്വാനംചെയ്തു.
കെ.എസ്.യു പറവൂര്‍ നിയോജകമണ്ഡലം കമ്മിറ്റി സംഘടിപ്പിച്ച സ്റ്റുഡന്‍സ് മെറിറ്റ് അവാര്‍ഡ്ദാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വിദ്യാഭ്യാസ നിലവാരം ഇനിയും ഉയര്‍ത്തികൊണ്ടുവരണം ഗുണകരമായ ചില സൂചനകള്‍ ഈ രംഗത്ത് കാണുന്നുണ്ട്.
സര്‍ക്കാര്‍ സ്‌കൂളുകളും എയിഡഡ സ്‌കൂളുകളും നൂറുശതമാനം വിജയം കൈവരിക്കുന്നത് നല്ല സൂചനകളാണ്. വിദ്യാര്‍ഥി രാഷ്ട്രീയത്തിലെ വഴിവിട്ട പോക്കുകള്‍ അക്രമരാഷ്ട്രീയത്തിന് കാരണമാകും. ജനാധിപത്യരീതിയിലുള്ള വിദ്യാര്‍ഥിരാഷ്ട്രീയം കാമ്പസുകളില്‍ ആകാം. പുതിയ പരീക്ഷണങ്ങളെ ആത്മവിശ്വാസത്തോടെ നേരിടണമെന്ന് ഉമ്മന്‍ചാണ്ടി വിദ്യാര്‍ഥി സമൂഹത്തോട് പറഞ്ഞു.
പറവൂര്‍ വ്യാപാരഭവന്‍ ഹാളില്‍ നടന്ന സമ്മേളനത്തില്‍ കെ.എസ്.യു പറവൂര്‍ ബ്ലോക്ക് പ്രസിഡന്റ് ഷാരോണ്‍ പനക്കല്‍ അധ്യക്ഷതവഹിച്ചു.എസ്.എസ്.എല്‍.സി, പ്ലസ് ടു പരീക്ഷകളില്‍ ഉന്നതവിജയം നേടിയവര്‍ക്ക് ഉമ്മന്‍ചാണ്ടി ഉപഹാരങ്ങള്‍ സമ്മാനിച്ചു. മികച്ചസ്‌കൂളുകള്‍ക്കുള്ള പുരസ്‌ക്കാരം പ്രൊഫ.കെ.വി തോമസ് എം.പി നല്‍കി. വി.ഡി സതീശന്‍ എം.എല്‍.എ ജി കാര്‍ത്തികേയന്‍ സ്മാരകഅവാര്‍ഡ് വിതരണം ചെയ്തു.
 മുന്‍ എം.പി കെ.പി ധനപാലന്‍, കെ.ടി ജോര്‍ജ് സ്മാരകപുരസ്‌ക്കാരം സമ്മാനിച്ചു. കെ.പി.സി.സി ജനറല്‍ സെക്രട്ടറി വത്സലപ്രസന്നകുമാര്‍, എം.ടി ജയന്‍, കെ.എ അഗസ്റ്റീന്‍, പി.വി മാജു, നഗരസഭാചെയര്‍മാന്‍ രമേഷ്‌കുറുപ്പ്,പി ആര്‍ സൈജന്‍,അരുണ്‍ ജോസ്,വി സി പത്രോസ്,തുടങ്ങിയവര്‍ സംസാരിച്ചു.