കൊടുങ്ങല്ലൂര്‍: ചന്തപ്പുര കോട്ടപ്പുറം ബൈപ്പാസ് റോഡ് സൗന്ദര്യവല്‍ക്കരണം നഗരസഭ ഏറ്റെടുക്കുന്നു. മൂന്നര കിലോമീറ്റര്‍ നീളമുള്ള ബൈപ്പാസിലെ മീഡിയനുകളില്‍ ജനപങ്കാളിത്തത്തോടെ പൂച്ചെടികള്‍ നട്ടുവളര്‍ത്തും, പദ്ധതിയുടെ നടത്തിപ്പിനായി കുടുംബശ്രീ, തൊഴിലുറപ്പ് പദ്ധതി തൊഴിലാളികള്‍, റസിഡന്‍സ് അസോസിയേഷനുകള്‍, മറ്റു സന്നദ്ധ സംഘടനകള്‍ തുടങ്ങിയവയുടെ സഹകരണം ലഭ്യമാക്കും. മുന്‍ എം.എല്‍.എയുടെ ഹരിതപാത പദ്ധതി  വിജയം കാണാത്തതിനെ തുടര്‍ന്നാണ് നഗരസഭ റോഡ് സൗന്ദര്യവല്‍ക്കരണം ഏറ്റെടുക്കുന്നത്.
ഇതിനായി നാളെ പ്രത്യേക നഗരസഭാ കൗണ്‍സില്‍ യോഗം ചേരുമെന്ന് ചെയര്‍മാന്‍ സി.സി വിപിന്‍ ചന്ദ്രന്‍ പറഞ്ഞു. നേരത്തെ ബൈപ്പാസിന്റെ ഉദ്ഘാടന വേളയില്‍ മൂന്നര കിലോമീറ്റര്‍ നീളമുള്ള നാലുവരിപാത ഹരിതപാതയാക്കുമെന്ന് അന്നത്തെ എം.എല്‍.എ ടി.എന്‍ പ്രതാപന്‍ പ്രഖ്യാപിച്ചിരുന്നു. പദ്ധതിയുടെ നടത്തിപ്പിനായി കാര്‍ഷിക സര്‍വകലാശാലയെ ചുമതലപ്പെടുത്തിയതായും അറിയിപ്പുണ്ടായി. എന്നാല്‍ നാളിതുവരെയായി ഹരിതപാത പദ്ധതിക്കായി ഒരു തൈ പോലും നടാനായില്ല. ഈ സാഹചര്യത്തിലാണ് കൊടുങ്ങല്ലൂര്‍ നഗരസഭ പദ്ധതി ഏറ്റെടുക്കുന്നത്. ഇതിനകം തന്നെ ബൈപ്പാസിലെ മീഡിയനുകളിലെ പുല്ലും പാഴ്‌ച്ചെടികളും നഗരസഭ വെട്ടി നീക്കിക്കഴിഞ്ഞു. നാളെ ചേരുന്ന നഗരസഭാ കൗണ്‍സില്‍ യോഗം പദ്ധതിയുടെ വിശദ രൂപം തയ്യാറാക്കും.