കാഠ്മണ്ഡു: 23ാം തവണയും എവറസ്റ്റ് കൊടുമുടിയില്‍ കയറി നേപ്പാള്‍ പര്‍വതാരോഹകന്‍ റെക്കോര്‍ഡിട്ടു. കാമി രിത എന്ന 49കാരനായ ഷെര്‍പയാണ് സ്വന്തം റെക്കോര്‍ഡ് തകര്‍ത്ത് ബുധനാഴ്ച രാവിലെ എവറസ്റ്റിന്റെ 29,035 അടി ഉയരത്തിലെത്തിയത്. മറ്റു 30 പേരും അദ്ദേഹത്തോടൊപ്പം ലോകത്തെ ഏറ്റവും ഉയര്‍ന്ന കൊടുമുടി കയറാനുണ്ടായിരുന്നു. രണ്ടു തവണകൂടി എവറസ്റ്റ് കയറണമെന്നാണ് തന്റെ ആഗ്രഹമെന്ന് അദ്ദേഹം പറഞ്ഞു.
1994ലാണ് രിത ആദ്യമായി എവറസ്റ്റ് കയറിയത്. പിന്നെ ഓരോ വര്‍ഷവും അതു തുടര്‍ന്നുവന്നു. 2015ല്‍ ഹിമപാതമുണ്ടായി 19 പര്‍വതാരോഹകര്‍ കൊല്ലപ്പെട്ടപ്പോള്‍ രിത ബേസ് ക്യാംപിലുണ്ടായിരുന്നു.