വടകര:കാരാട്ട് പുഴ കൈയേറിയ വിഷയത്തില്‍ വടകര എം.എല്‍.എ സി.കെ നാണു സ്വീകരിച്ച നിലപാടിനെ ചൊല്ലി താലൂക്ക് വികസന സമിതി യോഗത്തില്‍ യു.ഡി.എഫ് പ്രതിനിധികളുടെ വിമര്‍ശനം.
പുഴയില്‍ വ്യക്തിഗത കൈയേറ്റമുണ്ടായില്ലെന്ന തരത്തിലുള്ള എം.എല്‍.എയുടെ പരാമര്‍ശമാണ് വിമര്‍ശനത്തിനു കാരണമായത്. കാരാട്ട് പുഴ കൈയേറിയതായി റവന്യൂ വകുപ്പ് കണ്ടെത്തിയ സാഹചര്യത്തില്‍ സ്ഥലം പൂര്‍വസ്ഥിതിയിലാക്കണമെന്ന് യു.ഡി.എഫ്, ബി.ജെ.പി സമിതി അംഗങ്ങള്‍ യോഗം ആരംഭിച്ചയുടനെ  ആവശ്യമുന്നയിച്ചു.
ഇതിനു മറുപടിയായാണ് വ്യക്തിഗത കൈയേറ്റമുണ്ടായില്ലെന്നും വിഷയം കലക്ടര്‍ വിശദമായി പരിശോധിക്കുമെന്ന് സി.കെ നാണു പറഞ്ഞത്. എം.എല്‍.എയുടെ പരമാര്‍ശം ശരിയായില്ലെന്ന് യു.ഡി.എഫ് അംഗങ്ങള്‍ ചൂണ്ടിക്കാട്ടി.സ്ഥലം പരിശോധിച്ച് കലക്ടര്‍ക്ക് റിപ്പോര്‍ട്ട് നല്‍കിയതായി യോഗത്തില്‍ പങ്കെടുത്ത തഹസില്‍ദാര്‍ പറഞ്ഞു.
പൊതുസ്ഥലങ്ങളും ഇലക്ട്രിക് പോസ്റ്റുകളും മറ്റും വികൃതമാക്കുന്ന രീതിയില്‍ കൊടികള്‍, ബാനറുകള്‍, ചുമരെഴുത്തുകള്‍ എന്നിവ സ്ഥാപിക്കുന്നത് തടയാന്‍ നടപടിയെടുക്കണമെന്ന് വികസന സമിതി യോഗത്തില്‍ ആവശ്യമുയര്‍ന്നു. മുടങ്ങിപ്പോയ ഏറാമല വില്ലേജ് ഓഫിസ് കെട്ടിട നിര്‍മാണം പുനരാരംഭിക്കാന്‍ നടപടി വേണമെന്നും യോഗത്തില്‍ ആവശ്യമുയര്‍ന്നു.
ജില്ലാ പഞ്ചായത്ത് അംഗം എ.ടി ശ്രീധരന്‍ അധ്യക്ഷനായി. തൂണേരി ബ്ലോക്ക് പഞ്ചായത്ത് പ്രസിഡന്റ് സി.എച്ച് ബാലകൃഷ്ണന്‍, ആര്‍. ഗോപാലന്‍, പുത്തൂര്‍ അസീസ്, പ്രദീപ് ചോമ്പാല, ഇ.എം ബാലകൃഷ്ണന്‍, ടി.വി ബാലകൃഷ്ണന്‍, പി. അച്യുതന്‍,  ബാബു, ആവോലം രാധാകൃഷ്ണന്‍ സംസാരിച്ചു.