മിസോറി: അര്‍ബുദം ഉണ്ടാക്കുമെന്ന് തെളിഞ്ഞതിനെ തുടര്‍ന്ന് ജോണ്‍സണ്‍ ആന്‍ഡ് ജോണ്‍സണ്‍ പൗഡര്‍ കമ്പനിക്കെതിരേ അമേരിക്കയില്‍ 110 ദശലക്ഷം ഡോളര്‍ (ഏകദേശം 707 കോടി രൂപ) നഷ്ടപരിഹാരം വിധിച്ചു. മിസൗറി കോടതിയുടേതാണ് വിധി. വിര്‍ജിനിയ സ്വദേശിയായ ലൂയിസ് സ്‌ലെംപ് (62) ന് പൗഡര്‍ ഉപയോഗിച്ചതിനെ തുടര്‍ന്ന് അര്‍ബുദം ബാധിച്ച കേസിലാണ് വിധി. 2012 ലാണ് ഇവരുടെ കാന്‍സര്‍ രോഗം സ്ഥിരീകരിച്ചത്.
ജോണ്‍സണ്‍ ആന്‍ഡ് ജോണ്‍സണ്‍ ബേബി പൗഡര്‍ ഉപയോഗിച്ചതാണ് രോഗബാധയ്ക്ക് കാരണമെന്നാണ് ഇവര്‍ വാദിച്ചത്. ഇത് അംഗീകരിച്ച കോടതി സ്ത്രീക്ക് നഷ്ടപരിഹാരം നല്‍കാന്‍ കമ്പനിയോട് ആവശ്യപ്പെടുകയായിരുന്നു. 40 വര്‍ഷക്കാലം താന്‍ കമ്പനിയുടെ പൗഡറും ഷവര്‍ പൗഡറും ഉപയോഗിക്കുന്നയാളാണെന്ന് സ്ത്രീ കോടതിയില്‍ പറഞ്ഞു. മൂന്നു ആഴ്ചയായി കേസില്‍ വാദംകേള്‍ക്കല്‍ തുടരുകയായിരുന്നു. 12 അംഗ ബെഞ്ചാണ് വിധി പറഞ്ഞത്. എന്നാല്‍ തങ്ങളുടെ പൗഡര്‍ ഉപയോഗിച്ചാല്‍ അര്‍ബുദമുണ്ടാകുമെന്ന വാദം കമ്പനി തള്ളി. വിധിക്കെതിരേ അപ്പീല്‍ നല്‍കുമെന്നും കമ്പനി പറഞ്ഞു.
പരാതിയുടെ അടിസ്ഥാനത്തില്‍ ഈ വര്‍ഷം പുതിയ ക്ലിനിക്കല്‍ ട്രയല്‍ (മരുന്നു പരീക്ഷണം) നടത്തുമെന്നും കമ്പനി പ്രസ്താവനയില്‍ പറഞ്ഞു. വിധിക്ക് പിന്നാലെ കമ്പനിയുടെ ഓഹരി വിലയില്‍ ഇടിവു രേഖപ്പെടുത്തി. അതേസമയം സ്ത്രീക്ക് രോഗം ബാധിക്കാനിടയാക്കിയ സംഭവത്തില്‍ കമ്പനി ഖേദപ്രകടനം നടത്തുകയും ചെയ്തു.

ഇത്രയും
നഷ്ടപരിഹാരം ആദ്യം
ജോണ്‍സണ്‍ ആന്‍ഡ് ജോണ്‍സണ്‍ കമ്പനിക്ക് അര്‍ബുദ കേസില്‍ 110 ദശലക്ഷം ഡോളര്‍ നഷ്ടപരിഹാരം ആദ്യം. ഇതേ പരാതികളില്‍ 72 ദശലക്ഷം, 70 ദശലക്ഷം, 55 ദശലക്ഷം ഡോളര്‍ എന്നിങ്ങനെ വിവിധ കോടതികള്‍ പിഴ വിധിച്ചിരുന്നു. കമ്പനിക്കെതിരേ സെക്യൂരിറ്റീസ് ആന്റ് എക്‌സേഞ്ച് കമ്മിഷനും കേസ് നല്‍കിയിട്ടുണ്ട്.