പരപ്പനങ്ങാടി: കടലുണ്ടി-പരപ്പനങ്ങാടി റോഡിലെ പൊടിശല്യം ജനങ്ങള്‍ക്ക് ദുരിതമാകുന്നു. വാഹനം കടന്നുപോകുമ്പോള്‍ കാല്‍നടയാത്രക്കാരും ഇരുചക്ര വാഹനങ്ങളില്‍ യാത്ര ചെയ്യുന്നവരും പൊടിയില്‍ മുങ്ങുന്ന അവസ്ഥയിലാണ്. ബസ് യാത്രക്കാരും ഡ്രൈവര്‍മാരും ടവല്‍ കൊണ്ട് മൂക്കും വായയും കെട്ടിയിട്ടാണ് ഇതുവഴി യാത്ര ചെയ്യുന്നത്. പരപ്പനങ്ങാടി താനൂര്‍ റോഡ് മുതല്‍ കടലുണ്ടികടവ് വരെ ഇതു തന്നെയാണ് സ്ഥിതി. പൊടിശല്യം സഹിക്കാനാകാതെ റോഡിന് ഇരുവശവുമുള്ള കച്ചവടക്കാരും ഏറെ പ്രയാസത്തിലാണ്.
ശല്യം സഹിക്കവയ്യാതെ അഞ്ചപ്പുരയിലെ ചില കച്ചവടക്കാരും എസ്.ടി.യു ചുമട്ടു തൊഴിലാളികളും ചേര്‍ന്ന് പൈപ്പ് വാങ്ങി ദിവസവും നാലും അഞ്ചും തവണ നനക്കുകയാണിപ്പോള്‍ ചെയ്യുന്നത്. പുത്തലത്തു സുജീഷിന്റെ നേതൃത്വത്തില്‍ തൊഴിലാളികളായ പൂഴിക്കല്‍ അഷ്‌റഫ്, ജാവേദ് എന്നിവരടങ്ങിയ സംഘമാണ് ഈ ദൗത്യം ഏറ്റെടുത്തിരിക്കുന്നത്.നേരത്തെ പൊതുമരാമത്തു വകുപ്പിന്റെ കെട്ടിട സമുച്ചയങ്ങളുടെ ഉദ്ഘാടനത്തിനായി മന്ത്രി ജി സുധാകരന്‍ എത്തുന്നതിന്റെ തലേ ദിവസം ധൃതി പിടിച്ചു ക്വാറി വേസ്റ്റ് ഇട്ടു കുഴികള്‍ നികത്തിയിരുന്നു.
ഈ കുഴികള്‍ മഴ പെയ്തു ഒഴിഞ്ഞതോടെ വീണ്ടും പൂര്‍വസ്ഥിതിയില്‍ ആവുകയും പൊടിശല്യം വര്‍ധിക്കുകയുമാണ്. ആറു മാസമായി തകര്‍ന്നു കിടക്കുന്ന റോഡിലെ നിലവിലെ പൊടിശല്യം ഒഴിവാക്കുന്നതിനായി അടിയന്തിരമായി താല്‍കാലിക ടാറിങ് നടത്തണമെന്നും പിന്നീട് പൂര്‍ണമായ തോതില്‍ റോഡ് കേടു വരാത്ത വിധം പുനര്‍നിര്‍മിക്കണമെന്നുമാണ് നാട്ടുകാര്‍ ആവശ്യപ്പെടുന്നത്.