കാളികാവ്: അഞ്ച് മാസം കൊണ്ട് ഖുര്‍ആന്‍ മന:പാഠമാക്കി പതിനൊന്നുകാരന്‍. ചാഴിയോടിലെ ഈശ്വരത്ത് അബ്ദുല്‍ കരീമിന്റെ മകന്‍ അന്‍സിഫാണ് അപൂര്‍വ നേട്ടം കൈവരിച്ചത്.
ദിവസവും ഖുര്‍ആനിലെ നാലു പേജ് വീതം മന:പാഠമാക്കിയാണ് അന്‍സിഫ് അപൂര്‍വ നേട്ടം കൈവരിച്ചത്. എടക്കര നാരോക്കാവ് കരിയംതോട് അല്‍ അന്‍സാര്‍ ഹിഫ്‌ള് കോളേജ് വിദ്യാര്‍ഥിയായ അന്‍സിഫ് അനുവദിച്ച് കൊടുത്ത പാഠ ഭാഗത്തിലധികം പഠിച്ച് അധ്യാപകരുടെ പ്രശംസ പിടിച്ചുപറ്റി. അപൂര്‍വ നേട്ടം കൈവരിച്ച അന്‍ഷിഫിനെ നാട്ടുകാര്‍ അനുമോദിച്ചു. ചാഴിയോടില്‍ നടന്ന അനുമോദന ചടങ്ങ് കുഞ്ഞി മുഹമ്മദ് ബാഖവി ഉദ്ഘാടനം ചെയ്തു.
മേച്ചീരി ഹസ്സന്‍ അധ്യക്ഷനായി. മഹല്ല് ഖാസി സി.പി അബ്ദുല്‍ അസീസ് ദാരിമി, പി. ഷൗക്കത്തലി എന്ന കുഞ്ഞാന്‍, കുഞ്ഞിമുഹമ്മദ് ഹാജി, ജലീഷ് ചാഴിയോട്, യൂനുസ്, മുബശ്ശിര്‍, കാളികാവ് റൈഞ്ച് സെക്രട്ടറി വി.എം. ഹനീഫ ഫൈസി, അന്‍സിഫ് തുടങ്ങിയവര്‍ പ്രസംഗിച്ചു.