ഹൈദരാബാദ്: മികച്ച ഫോമിലുള്ള സണ്‍റൈസേഴ്‌സ് ഹൈദരാബാദിനെ അവരുടെ തട്ടകത്തില്‍ വീഴ്ത്തി റൈസിങ് പൂനെ സൂപ്പര്‍ജയ്ന്റ് എട്ടാം വിജയത്തോടെ ഐ.പി.എല്‍ പോയിന്റ് പട്ടികയില്‍ രണ്ടാം സ്ഥാനത്തേക്ക് കയറി. വിജയത്തോടെ പ്ലേയോഫില്‍ സ്ഥാനം ഉറപ്പാക്കാനും അവര്‍ക്ക് സാധിച്ചു. ഹൈദരാബാദിനെ 12 റണ്‍സിനാണ് പൂനെ വീഴ്ത്തിയത്. ആദ്യം ബാറ്റ് ചെയ്ത പൂനെ നിശ്ചിത 20 ഓവറില്‍ എട്ട് വിക്കറ്റ് നഷ്ടത്തില്‍ 148 റണ്‍സെടുത്തപ്പോള്‍ വിജയം തേടിയിറങ്ങിയ ഹൈദരാബാദിന്റെ പേരാട്ടം 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 136 റണ്‍സിലൊതുങ്ങി. പൂനെ രണ്ടാം സ്ഥാനത്തെത്തിയതോടെ കൊല്‍ക്കത്ത മൂന്നാം സ്ഥാനത്തേക്കും ഹൈദരാബാദ് നാലാം സ്ഥാനത്തേക്കും ഇറങ്ങി.
അവസാന ഓവറില്‍ ഹാട്രിക്കടക്കം അഞ്ച് വിക്കറ്റുകള്‍ വീഴ്ത്തിയ പേസര്‍ ജയദേവ് ഉനദ്കടിന്റെ ബൗളിങാണ് പൂനെയ്ക്ക് വിജയം സമ്മാനിക്കുന്നതില്‍ നിര്‍ണായകമായത്. ഉനദ്കടാണ് കളിയിലെ താരം. അവസാന ആറ് പന്തില്‍ ഹൈദരാബാദിന് വിജയിക്കാന്‍ വേണ്ടത് 13 റണ്‍സായിരുന്നു. നാല് വിക്കറ്റുകള്‍ കൈയിലിരിക്കേ ശ്രമിച്ചാല്‍ എത്താമായിരുന്ന ലക്ഷ്യമായിരുന്നു അവര്‍ക്ക്. അവസാന ഓവര്‍ എറിയാനെത്തിയ ഉനദ്കടിന്റെ മികവ് ഹൈദരാബാദിന്റെ എല്ലാ പ്രതീക്ഷകളും അവസാനിപ്പിച്ചു. രണ്ടാം പന്തില്‍ ബിപുല്‍ ശര്‍മയെ സ്റ്റോക്‌സിന്റെ കൈകളില്‍ എത്തിച്ച ഉനദ്കട് മൂന്നാം പന്തില്‍ റാഷിദ് ഖാനെ സ്വയം ക്യാച്ചെടുത്ത് പുറത്താക്കി. നാലാം പന്തില്‍ ഭുവനേശ്വര്‍ കുമാറിനെ മനോജ് തിവാരിയുടെ കൈകളിലെത്തിച്ച് താരം ഹാട്രിക്കും പൂനെയുടെ വിജയവും ഉറപ്പാക്കി.
അവസാന ഓവറില്‍ ഒരു റണ്‍സ് പോലും വിട്ടുകൊടുക്കാതെ മെയ്ഡന്‍ ഓവര്‍ എറിഞ്ഞാണ് ഉനദ്കട് ഹാട്രിക്ക് കുറിച്ചത്. നേരത്തെ ആദ്യ മൂന്നോവറില്‍ 30 റണ്‍സ് വഴങ്ങി രണ്ട് വിക്കറ്റെടുത്ത താരം കളി അവസാനിക്കുമ്പോള്‍ നാലോവറില്‍ 30 റണ്‍സിന് അഞ്ച് വിക്കറ്റ് വീഴ്ത്തിയിരുന്നു. മൂന്ന് വിക്കറ്റെടുത്ത് ബെന്‍ സ്റ്റോക്‌സും വിജയത്തില്‍ നിര്‍ണായക പങ്ക് വഹിച്ചു.
വെറ്ററന്‍ താരം യുവരാജ് സിങാണ് ഹൈദരാബാദിന്റെ ടോപ് സ്‌കോറര്‍. യുവരാജ് 43 പന്തില്‍ രണ്ട് സിക്‌സും നാല് ഫോറും പറത്തി 47 റണ്‍സെടുത്തു. നായകന്‍ ഡേവിഡ് വാര്‍ണര്‍ 34 പന്തില്‍ 40 റണ്‍സും ശിഖര്‍ ധവാന്‍ 12 പന്തില്‍ 19 റണ്‍സെടുത്തും പുറത്തായി. പിന്നീടൊരു ബാറ്റ്‌സ്മാന്‍മാര്‍ക്കും രണ്ടക്കം കടക്കാന്‍ സാധിച്ചില്ല.
ടോസ് നേടി ഹൈദരാബാദ് പൂനെയെ ബാറ്റിങിനയക്കുകയായിരുന്നു. മികച്ച ബൗളിങിലൂടെ പൂനെയുടെ ബാറ്റ്‌സ്മാന്‍മാര്‍ക്ക് കടിഞ്ഞാണിടാന്‍ ഹൈദരാബാദിനായി. ബെന്‍ സ്റ്റോക്‌സ് മൂന്ന് സിക്‌സും ഒരു ഫോറുമടക്കം 25 പന്തില്‍ 39 റണ്‍സെടുത്ത് ടോപ് സ്‌കോററായി. മുന്‍ നായകന്‍ ധോണി 21 പന്തില്‍ 31 റണ്‍സെടുത്ത് നിര്‍ണായക സംഭാവന നല്‍കി. നായകന്‍ സ്മിത്ത് (34), രഹാനെ (22) എന്നിവരും ഭേദപ്പെട്ട പ്രകടനം പുറത്തെടുത്തു. ഹൈദരാബാദിനായി സിദ്ധാര്‍ഥ് കൗള്‍ നാല് വിക്കറ്റുകള്‍ വീഴ്ത്തി.