മുതുകുളം: സ്ത്രീകള്‍ മാത്രം താമസിക്കുന്ന വീടിനു നേരെ സാമൂഹികവിരുദ്ധാക്രമണം. പുതിയവിള വടക്ക് പേരാത്ത് ജംക്ഷനു സമീപം വിജയഭവനം വിജയകുമാറിന്റെ വീടിനു നേരെയാണ് ഇന്നലെ പുലര്‍ച്ചെ 2.30ഓടെ ആക്രമണം ഉണ്ടായത്.
 റോഡിന്റെ വശത്തുള്ള മതിലിനു പുറത്തു നിന്ന് വീടിനു നേരെ കല്ലുകള്‍ എറിഞ്ഞാണ് ആക്രമണം നടത്തിയത്. കല്ലേറില്‍ വീടിന്റെ ജനല്‍ പാളിയുടെ ഗ്ലാസുകള്‍ പൊട്ടിയിട്ടുണ്ട്. വിജയകുമാര്‍ വിദേശത്താണ്.  ഭാര്യ രശ്മിയും മാതാവും രണ്ടു കുട്ടികളും മാത്രമാണ് വീട്ടിലുണ്ടായിരുന്നത്.
ശബ്ദം കേട്ട് പുറത്തെ ലൈറ്റുകള്‍ ഇട്ടതോടെ ആക്രമികള്‍ കടന്നു കളഞ്ഞു. നേരത്തേയും  വീടിനു നേരെ സാമൂഹിക വിരുദ്ധാക്രമണം ഉണ്ടാവുകയും സൈക്കിള്‍ മോഷണം പോവുകയും ചെയ്തിരുന്നതായി വീട്ടുകാര്‍ പറഞ്ഞു. കനകക്കുന്ന് പൊലീസ് കേസെടുത്ത് അന്വേഷണം ആരംഭിച്ചു.