റിയാദ്: ജിദ്ദ-കൊച്ചി വിമാന സര്‍വിസ് സമയത്തില്‍ മാറ്റമുള്ളതായി എയര്‍ ഇന്ത്യ. പതിനേഴിന് രാത്രി ജിദ്ദയില്‍ നിന്നും പുറപ്പെടേണ്ട എയര്‍ ഇന്ത്യ വിമാന സര്‍വിസിലാണ് ഒന്നിലധികം തവണ അറിയിപ്പുകളുമായി എയര്‍ ഇന്ത്യ രംഗത്തെത്തിയത്. പുതിയ സമയക്രമ പ്രകാരം പതിനേഴിന് രാത്രി 11:15 നു ജിദ്ദയില്‍ നിന്നും പുറപ്പെട്ടു പതിനെട്ടിന് രാവിലെ 07:05 നു കൊച്ചിയില്‍ ഇറങ്ങുന്ന എ. ഐ 964 ജിദ്ദ-കൊച്ചി വിമാനം മൂന്നര മണിക്കൂര്‍ വൈകി പതിനെട്ടിന് പുലര്‍ച്ചെ 02:45 പുറപ്പെട്ടു 10:35നു കൊച്ചിയില്‍ എത്തിച്ചേരുമെന്നാണ് എയര്‍ ഇന്ത്യ ട്രാവല്‍സ് ഏജന്‍സികള്‍ക്ക് നല്‍കിയ വിവരം.
നേരത്തെ ഇതേ സര്‍വിസ് തൊട്ടടുത്ത ദിവസത്തേക്ക് മാറ്റിയതായി അറിയിപ്പ് നല്‍കിയ ശേഷം പിന്നീട് വിമാനം ആദ്യം ഷെഡ്യൂള്‍ ചെയ്തത് പ്രകാരം മൂന്നര മണിക്കൂര്‍ വൈകിയാണ് സര്‍വിസ് നടത്തുകയെന്നാണ് ട്രാവല്‍സ് ഏജന്‍സികള്‍ക്ക് അറിയിപ്പ് നല്‍കിയിരിക്കുന്നത്. സര്‍വിസ് നീട്ടിവയ്ക്കാനുള്ള കാരണം വ്യക്തമല്ല.