തളിപ്പറമ്പ്: കസ്റ്റഡിയില്‍നിന്ന് രക്ഷപ്പെട്ട തളിപ്പറമ്പ് ഹണി ട്രാപ്പ് കേസിലെ മുഖ്യപ്രതി റുബൈസിനായി അന്വേഷണം ഊര്‍ജിതമാക്കി. റുബൈസ് ചൊവ്വാഴ്ച വൈകിട്ട് തലശ്ശേരിയിലെത്തിയതായി പൊലിസിന് വിവരം ലഭിച്ചു. തിങ്കളാഴ്ച രാത്രിയാണ് കോഴിക്കോട് മെഡിക്കല്‍ കോളജിലെ കാന്‍സര്‍ വാര്‍ഡില്‍നിന്ന് റുബൈസ് രക്ഷപ്പെട്ടത്.
കേസിലെ പ്രതിയായ എന്‍.ടി.ടി.എഫ് വിദ്യാര്‍ഥി അമല്‍ദേവിന്റെ തലശ്ശേരി കൊടുവള്ളിയിലെ ക്വാര്‍ട്ടേഴ്‌സിലെത്തിയ റുബൈസ് അവിടെനിന്ന് രക്ഷപ്പെടുകയായിരുന്നു. ഈ സമയത്ത് അവിടെയുണ്ടായിരുന്ന വിദ്യാര്‍ഥികള്‍ തങ്ങള്‍ക്ക് റുബൈസ് കസ്റ്റഡിയില്‍നിന്ന് രക്ഷപ്പെട്ട വിവരം അറിയില്ലായിരുന്നുവെന്ന് പൊലിസിനോട് പറഞ്ഞു. കര്‍ണാടക കുടകില്‍ വ്യാപക ബന്ധങ്ങളുള്ള റുബൈസ് അങ്ങോട്ടേക്ക് രക്ഷപ്പെട്ടിരിക്കാനാണ് സാധ്യതയെന്നാണ് പൊലിസ് സംശയിക്കുന്നത്.