ക്വലാലംപൂര്‍: സുല്‍ത്താന്‍ അസ്‌ലന്‍ ഷാ കപ്പ് ഹോക്കിയില്‍ ഇന്ത്യക്ക് വെങ്കല മെഡല്‍. മൂന്ന്, നാല് സ്ഥാനക്കാരെ നിര്‍ണയിക്കാനുള്ള പോരാട്ടത്തില്‍ ഇന്ത്യ മറുപടിയില്ലാത്ത നാല് ഗോളുകള്‍ക്ക് ന്യൂസിലന്‍ഡിനെ വീഴ്ത്തിയാണ് വെങ്കല മെഡല്‍ സ്വന്തമാക്കിയത്. രുപീന്ദര്‍ പാല്‍ സിങ് നേടിയ ഇരട്ട ഗോളുകളാണ് ഇന്ത്യന്‍ ജയം അനായാസമാക്കിയത്. ശേഷിച്ച ഗോളുകള്‍ എസ്.വി സുനില്‍, തല്‍വീന്ദര്‍ സിങ് എന്നിവരും നേടി.
കളിയുടെ തുടക്കം മുതല്‍ തന്നെ ഇന്ത്യ ആക്രമിച്ചു കളിച്ചു. തുടക്കത്തില്‍ തന്നെ രണ്ട് പെനാല്‍റ്റി കോര്‍ണറുകള്‍ ലഭിച്ചെങ്കിലും അത് മുതലാക്കാന്‍ സാധിച്ചില്ല. 12ാം മിനുട്ടില്‍ വല ചലിപ്പിക്കാന്‍ ഒത്തുവന്ന സുവര്‍ണാവസരവും ഇന്ത്യന്‍ താരങ്ങള്‍ക്ക് മുതലാക്കാന്‍ സാധിക്കാതെ പോയി. 17, 27 മിനുട്ടുകളിലാണ് പെനാല്‍റ്റി കോര്‍ണറുകള്‍ വലയിലെത്തിച്ച് രുപീന്ദര്‍ പാല്‍ സിങ് ഇന്ത്യക്ക് ലീഡ് സമ്മാനിച്ചത്. പിന്നീട് 48ാം മിനുട്ടില്‍ സുനിലിലൂടെ ഇന്ത്യ മൂന്നാം ഗോളും സ്വന്തമാക്കി. ടൂര്‍ണമെന്റില്‍ സുനില്‍ നേടുന്ന ആദ്യ ഗോള്‍ കൂടിയായിരുന്നു ഇത്. കളിയുടെ അവസാന നിമിഷങ്ങളിലാണ് തല്‍വീന്ദര്‍ ഇന്ത്യക്ക് നാലാം ഗോള്‍ സമ്മാനിച്ചത്.
അഞ്ചാം സ്ഥാനക്കാരെ നിര്‍ണയിക്കുന്ന പോരാട്ടത്തില്‍ മലേഷ്യ 3-1ന് ജപ്പാനെ കീഴടക്കി.