പാപ്പിനിശ്ശേരി: പാപ്പിനിശ്ശേരി റെയില്‍വേഗേറ്റ് മേല്‍പ്പാല നിര്‍മാണത്തിന്റെ ഭാഗമായി സ്ഥാപിച്ച അടിപ്പാതയുടെ ബാക്കിയുള്ള ജോലികള്‍ വൈകുന്നു.
ഗേറ്റിന് ഇരുവശത്തുമുള്ള ചെറുവാഹനങ്ങള്‍ക്കും കാല്‍നട യാത്രക്കാര്‍ക്കും സഞ്ചരിക്കുന്നതിന് റെയില്‍വേ കോണ്‍ക്രീറ്റില്‍ നിര്‍മിച്ച അടിപ്പാത ഏപ്രില്‍ 22നാണ്  പാളത്തിനടിയിലൂടെ തുരങ്കമുണ്ടാക്കി സ്ഥാപിച്ചത്. അടിപ്പാത ജോലികള്‍ക്കായി ഗേറ്റടച്ചിട്ടതിനു ശേഷവും പ്രവൃത്തികള്‍ പൂര്‍ത്തിയാക്കുന്നതിനുള്ള നടപടികള്‍ അധികൃതര്‍ സ്വീകരിക്കുന്നില്ല. പാപ്പിനിശ്ശേരി മേല്‍പ്പാലത്തിന്റെ ടാറിങ് ജോലികള്‍ കഴിഞ്ഞതോടെ വാഹനങ്ങള്‍ പാലത്തിലൂടെ കടന്ന് പോകുന്നുണ്ട്. ഇത് കാരണം അടിപ്പാതയുടെ ജോലികള്‍ ഇപ്പോള്‍ നിര്‍ത്തിവച്ച നിലയിലാണ്. അടിപ്പാത സ്ഥാപിക്കുന്നതിനും ട്രെയിനുകള്‍ക്ക് കടന്ന് പോകുന്നതിനും റെയില്‍വേ പാളത്തിന്റെ അടിയില്‍  ഇരുവശത്തുമായി സ്ഥാപിച്ച ഗര്‍ഡറുകള്‍ ഏപ്രില്‍ 28നാണ് നീക്കം ചെയ്തത്.
ഇതോടെ റെയില്‍വേയുടെ ജോലികള്‍ അവസാനിച്ചു. ഇരുവശത്തും അടിപ്പാതയുമായി യോജിപ്പിച്ചുള്ള അപ്രോച്ച് റോഡിന്റെ ബാക്കിയുള്ള ജോലികള്‍ ചെയ്യണ്ടത് കെ.എസ്.ടി.പിയാണ്. മഴക്കാലത്തിന് മുമ്പ് ജോലികള്‍ പൂര്‍ത്തിയാക്കാനായില്ലെങ്കില്‍ പ്രദേശം മുഴുവന്‍ ചെളിക്കുളമായി മാറും. അടിപ്പാതയുടെ രണ്ട് വശത്തും മണ്ണിട്ടതിനാല്‍ മഴ പെയ്താല്‍ ഇത് വഴി നടന്നു പോകാന്‍ കഴിയാത്ത അവസ്ഥയാണ് ഉണ്ടാകാന്‍ പോകുന്നത്. അപ്രോച്ച് റോഡുകളുടെ ജോലികള്‍ക്ക് ശേഷം മാത്രമേ പാലത്തിന് അടിഭാഗത്തെ ഇരുവശത്തെയും സര്‍വിസ് റോഡുകളുടെ അറ്റകുറ്റപ്പണി ചെയ്ത് ഗതാഗത യോഗ്യമാക്കാനും സാധിക്കുകയുള്ളു. പ്രവൃത്തികള്‍ നീണ്ടുപോയാല്‍ മഴക്കാലത്ത് പ്രദേശത്തെ സ്ഥാപനങ്ങള്‍, കച്ചവടക്കാര്‍, ആരാധനലായങ്ങള്‍ തുടങ്ങിയവയിലേക്ക് ഇതുവഴി നടന്നു പോകാന്‍ കഴിയാതെയും വാഹനങ്ങള്‍ സഞ്ചരിക്കാന്‍ കഴിയാത്ത രീതിയില്‍ ചെളി നിറയുന്നതിനാല്‍ ഉടന്‍ പ്രവൃത്തി ആരംഭിക്കണമെന്നാണ് നാട്ടുകാരുടെ ആവശ്യം.