തലശ്ശേരി: ഇല്ലത്ത്താഴെ, കൊമ്മല്‍വയല്‍ പ്രദേശങ്ങളില്‍ വെള്ളിയാഴ്ച രാത്രി മുതലുണ്ടായ അക്രമ സംഭവങ്ങളില്‍ ഏഴ് വീടുകളും ഒന്‍പതു വാഹനങ്ങളും ആക്രമിച്ചു. സംഭവങ്ങളുമായി ബന്ധപ്പെട്ട് സി.പി.എം-ബി.ജെപി പ്രവര്‍ത്തകരായ 15 പേരെ ന്യൂമാഹി പൊലിസ് കസ്റ്റഡിയിലെടുത്തു. പ്രവര്‍ത്തകരെ വിട്ടയക്കണമെന്നാവശ്യപ്പെട്ട് സംഘപരിവാര്‍ പ്രവര്‍ത്തകര്‍ സ്റ്റേഷനിലെത്തി ബഹളമുണ്ടാക്കി.
തലശ്ശേരി നഗരസഭയുടെ 150ാം വാര്‍ഷികാഘോഷത്തിന്റെ ഭാഗമായി വാര്‍ഡ്തല പരിപാടികള്‍ നടക്കുന്നതിനിടെയാണ് സംഘര്‍ഷം ഉടലെടുത്തത്. വെള്ളിയാഴ്ച വൈകുന്നേരം വിളംബരം ജാഥ കടന്നുപോകുന്നതിനിടെ വയലില്‍ ഫുട്‌ബോള്‍ കളിച്ച് കൊണ്ടിരിക്കുകയായിരുന്ന ബി.ജെ.പി പ്രവര്‍ത്തകരെ വിളംബര ജാഥയിലുള്ള സി.പി.എം പ്രവര്‍ത്തകര്‍ ഉടുമുണ്ട് പൊക്കി കാണിച്ചെന്നാരോപിച്ചാണ് സംഘര്‍ഷത്തിന്റെ തുടക്കം.
ജാഥയുടെ പിന്‍നിരയിലുള്ളവരാണ് പ്രശ്‌നമുണ്ടാക്കിയതെന്നാരോപിച്ച് ബി.ജെ.പി പ്രവര്‍ത്തകര്‍ ചോദ്യം ചെയ്യുകയും സംഘര്‍ഷം ഉണ്ടാവുകയും ചെയ്തു. ഇതിനിടെ മര്‍ദനമേറ്റ ബി.ജെ.പി പ്രവര്‍ത്തകരായ സനല്‍, വിഷ്ണു എന്നിവരെ തലശ്ശേരി ഇന്ദിരാഗാന്ധി സഹകരണ ആശുപത്രിയില്‍ പ്രവേശിപ്പിച്ചു.
ഇതിന് പിന്നാലെയാണ് ഇരു വിഭാഗത്തില്‍പ്പെട്ടവരുടെ വീടുകളും വാഹനങ്ങളും ആക്രമിക്കപ്പെട്ടത്. സി.പി.എം കൊമ്മല്‍വയല്‍ ബ്രാഞ്ച് സെക്രട്ടറി രാജീവ് കുമാര്‍, സി.പി.എം പ്രവര്‍ത്തകരായ പുന്നോല്‍ സര്‍വിസ് സഹകരണ ബാങ്ക് ജീവനക്കാരന്‍ റിക്‌സി നിവാസില്‍ രവീന്ദ്രന്‍, നങ്ങാറത്ത്പീടികയിലെ ചാലി ജയന്‍, കാര്‍ത്ത്യായനി, സദാനന്ദന്‍ എന്നിവരുടെയും ബി.ജെ.പി പ്രവര്‍ത്തകരായ ശ്രീവത്സത്തില്‍ രാജന്‍, സായിഷ് എന്നിവരുടെ വീടുകള്‍ക്കു നേരെയുമാണ് അക്രമമുണ്ടായത്.
സി.പി.എം പ്രവര്‍ത്തകന്‍ രവീന്ദ്രന്റെ വീട് ആക്രമണത്തിനിടെ രവീന്ദ്രന്റെ മകള്‍ നിതക്ക് തലയ്ക്ക് പരുക്കേറ്റു. നിതയെ തലശ്ശേരി സഹകരണ ആശുപത്രിയില്‍ പ്രവേശിപ്പിച്ചു. അക്രമം നടന്ന വീടുകളില്‍ നിര്‍ത്തിയിട്ട കാറുകളും ബൈക്കുകളും തകര്‍ക്കപ്പെട്ടു. അക്രമം നടന്ന വീടുകള്‍ എ.എന്‍ ഷംസീര്‍ എം.എല്‍.എ, സി.പി.എം തലശ്ശേരി ഏരിയാ സെക്രട്ടറി എം.സി പവിത്രന്‍, ബി.ജെ.പി ജില്ലാ പ്രസിഡന്റ് പി. സത്യപ്രകാശ് എന്നിവര്‍ സന്ദര്‍ശിച്ചു. സംഘര്‍ഷാവസ്ഥയിലായ പ്രദേശത്ത് കനത്ത പൊലിസ് കാവല്‍ ഏര്‍പ്പെടുത്തി.