പനാജി: ഐ ലീഗ് ക്ലബ് ചര്‍ച്ചില്‍ ബ്രദേഴ്‌സിന്റെ പരിശീലകനായി മുന്‍ ഘാന ദേശീയ താരം എഡ്വാര്‍ഡ് അന്‍സഹിനെ നിയമിച്ചു.
ഘാനയുടെ മുന്‍ ദേശീയടീം ഗോള്‍ കീപ്പര്‍ ആയിരുന്നു എഡ്വാര്‍ഡ് അന്‍സഹ്. 1992ല്‍ ആഫ്രിക്കന്‍ നാഷന്‍സ് കപ്പ് റണ്ണേഴ്‌സ് അപ്പായ ഘാന ടീമിലെ അംഗമായിരുന്നു ഇദ്ദേഹം. മുന്‍പ് ചര്‍ച്ചില്‍ ബ്രദേഴ്‌സിനായി കളിച്ചിട്ടുമുണ്ട്.
1999 മുതല്‍ 2004 വരെ അഞ്ചു വര്‍ഷം ചര്‍ച്ചിലിന്റെ ഗോള്‍ വല കാത്തു. 41ാം വയസില്‍ ചര്‍ച്ചിലിന് വേണ്ടി കളിച്ച് കൊണ്ടിരിക്കുമ്പോഴാണ് ഇദ്ദേഹം വിരമിച്ചത്. 2006, 2010 ലോകകപ്പുകളില്‍ ഘാന കളിക്കുമ്പോള്‍ അവരുടെ കോച്ചിങ് സ്റ്റാഫില്‍ എഡ്വാര്‍ഡും ഉണ്ടായിരുന്നു. അടുത്ത മാസമാകും എഡ്വാര്‍ഡ് ചര്‍ച്ചിലിന്റെ ചുമതലയേറ്റെടുക്കുക. ഈ സീസണില്‍ മികച്ച പ്രകടനം പുറത്തെടുത്ത ചര്‍ച്ചിലിന് എഡ്വാര്‍ഡിന്റെ വരവ് കൂടുതല്‍ കരുത്തേകും.