തിരുവനന്തപുരം: സംസ്ഥാനത്തെ 262 ഉപഭോക്തൃസേവനകേന്ദ്രങ്ങളില്‍ ആധാര്‍ എന്റോള്‍മെന്റിനുള്ള സംവിധാനം ഒരുമാസത്തിനുള്ളില്‍ നിലവില്‍ വരുമെന്ന് കേരള ബി.എസ്.എന്‍.എല്‍ ചീഫ് ജനറല്‍ മാനേജര്‍ ഡോ. പി.ടി മാത്യു വാര്‍ത്താ സമ്മേളനത്തില്‍ അറിയിച്ചു. ഇതിനായുള്ള പരിശീലനം ജീവനക്കാര്‍ക്ക് നല്‍കിവരികയാണ്.

ബി.എസ്.എന്‍.എല്‍ ഉപയോക്താക്കള്‍ക്ക് ആമസോണ്‍ പ്രൈം മെമ്പര്‍ഷിപ്പും ലഭ്യമാക്കും. 399 രൂപ മുതലുള്ള പ്രതിമാസ നിശ്ചിതചാര്‍ജ്ജുള്ള പോസ്റ്റ് പെയ്ഡ് പ്ലാനുകളിലുള്ള മൊബൈല്‍ ഉപയോക്താക്കള്‍ക്കും 745 രൂപ മുതലുള്ള പ്രതിമാസ നിശ്ചിതചാര്‍ജ്ജുള്ള ബ്രോഡ്ബാന്‍ഡ്, എഫ്.ടി.ടി.എച്ച് ഉപഭോക്താക്കള്‍ക്കും 12 മാസത്തേക്ക് അധിക നിരക്ക് നല്‍കാതെ 999 രൂപയുടെആമസോണ്‍ പ്രൈം മെമ്പര്‍ഷിപ്പ് ലഭിക്കുന്നതാണ്.
ആമസോണ്‍ പ്രൈം അംഗത്വംഉള്ളവര്‍ക്ക് ആമസോണ്‍ പ്രൈം വീഡിയോസ്ട്രീമിംഗ്, പരസ്യരഹിത പ്രൈം മ്യൂസിക് സേവനങ്ങള്‍ക്കൊപ്പംഅര്‍ഹതയുള്ള ഉല്‍പന്നങ്ങള്‍ക്ക് അതിവേഗ ഡെലിവറി സൗകര്യവും ലഭിക്കുന്നതായിരിക്കും. ബി.എസ്.എന്‍.എല്‍ ഉപയോക്താക്കള്‍ക്ക് നെറ്റ്ഫ്‌ളിക്‌സ് സേവനങ്ങള്‍ മെയ് മാസാവസാനം മുതല്‍ ലഭ്യമാകും.

സംസ്ഥാന സര്‍ക്കാരിനുവേണ്ടിയുള്ള 1855 ഹോട്ട് സ്‌പോട്ടുകള്‍ ഉള്‍പ്പെടെ, 5481 ആക്‌സസ് പോയിന്റുകളോടുകൂടിയ 3055 ഹോട്ട്‌സ്‌പോട്ടുകള്‍ ബി.എസ്.എന്‍.എല്‍ ലഭ്യമാക്കിയിട്ടുണ്ട്. 235 ടെലിഫോണ്‍ എക്‌സ്‌ചേഞ്ചുകളില്‍കൂടി ഹോട്ട് സ്‌പോട്ടുകള്‍ സ്ഥാപിക്കാനും പദ്ധതിയുണ്ട്.
വാര്‍ഷിക പ്ലാനുകള്‍ തെരഞ്ഞെടുക്കുന്ന ബി.എസ്.എന്‍.എല്‍ ലാന്‍ഡ് ലൈന്‍, ബ്രോഡ് ബാന്‍ഡ്, ഫൈബര്‍ ടുഹോം, ഉപഭോക്താക്കള്‍ക്ക് 25 ശതമാനം ക്യാഷ് ബാക്ക്ഓഫര്‍ ലഭ്യമാണ്. പുതിയ വരിക്കാര്‍ക്കും നിലവിലുള്ള വരിക്കാര്‍ക്കും ഈ ഓഫര്‍ ലഭ്യമായിരിക്കും.
ഉപഭോക്താക്കള്‍ക്ക് നിരവധി പേര്‍ക്ക് ഒരുമിച്ച് എസ്.എം.എസുകള്‍ അയക്കാനുള്ള വെബ്‌പോര്‍ട്ടലും നിലവില്‍ വന്നു. ഇതിനുള്ള തനത് സോഫ്റ്റ്‌വെയര്‍ വികസിപ്പിച്ചു. ഇതിന്റെ മൊബൈല്‍ ആപ് ഉടന്‍ പുറത്തിറക്കും.

വരുന്ന സാമ്പത്തിക വര്‍ഷം 20 ലക്ഷം പുതിയ മൊബൈല്‍ കണക്ഷനുകളും ഒരു ലക്ഷം ലാന്‍ഡ് ലൈന്‍ കണക്ഷനുകളും രണ്ടു ലക്ഷം ബ്രോഡ് ബാന്‍ഡ് കണക്ഷനുകളും 2.5 ലക്ഷം പുതിയ എഫ്.ടി.ടി.എച്ച് കണക്ഷനുകളും നല്‍കാനാണ് ലക്ഷ്യമിടുന്നത്. കേരളത്തിലാണ്ഏറ്റവുംകൂടുതല്‍ എഫ്.ടി.ടി.എച്ച് കണക്ഷനുകളുള്ളത്.
സാങ്കേതിക തടസങ്ങള്‍ കാരണം 4ജി നടപ്പാക്കാന്‍ കഴിയാത്ത പ്രധാനപ്പെട്ട പല നഗരങ്ങളെയും 2020 ഓടുകൂടി നേരിട്ട് 5 ജിയിലേക്ക് മാറ്റാനുള്ള ശ്രമത്തിലാണ്. വാര്‍ത്താ സമ്മേളനത്തില്‍ പ്രിന്‍സിപ്പല്‍ ജനറല്‍ മാനേജര്‍മാരായ ഡോ. എസ്‌ജ്യോതിശങ്കര്‍, കെകുളന്തൈവേല്‍, എസ്.എസ് തമ്പി, സതീഷ്‌റാം, ജനറല്‍ മാനേജര്‍മാരായ പിജി നിര്‍മ്മല്‍, സുകുമാരന്‍ എന്‍.കെ, സതീഷ് ആര്‍ സംബന്ധിച്ചു.