കോഴിക്കോട്: കാലിക്കറ്റ് സിറ്റി സര്‍വിസ് സഹകരണ ബാങ്ക് ഏര്‍പ്പെടുത്തിയ ഡോ. വര്‍ഗീസ് കുര്യന്‍ അവാര്‍ഡ് അട്ടപ്പാടി അഗളി മുണ്ടന്‍പാറ ക്ഷീരോല്‍പാദക സഹകരണ സംഘത്തിന്. ഒരു ലക്ഷം രൂപയും പ്രശസ്തി പത്രവും അടങ്ങുന്നതാണ് അവാര്‍ഡ്.
കന്നുകാലി വളര്‍ത്തലിലും പാല്‍ ഉല്‍പ്പാദന മേഖലയിലും അട്ടപ്പാടിയിലെ പ്രതികൂല കാലാവസ്ഥയിലും മികച്ച പ്രവര്‍ത്തനം നടത്തിയതിനാണ് പുരസ്‌കാരമെന്ന് ബാങ്ക് ചെയര്‍മാന്‍ ജി. നാരായണന്‍കുട്ടി വാര്‍ത്താസമ്മേളനത്തില്‍ പറഞ്ഞു. ബാങ്കിന്റെ ചാലപ്പുറത്തുള്ള ഓഡിറ്റോറിയത്തില്‍ 10ന് വൈകിട്ട് നാലിന് നടക്കുന്ന ചടങ്ങില്‍ മന്ത്രി ടി.പി രാമകൃഷ്ണന്‍ അവാര്‍ഡ് വിതരണം ചെയ്യും.
ബാങ്ക് ജനറല്‍ മാനേജര്‍ സാജു ജെയിംസ്, ഡയരക്ടര്‍മാരായ അഡ്വ. എ. ശിവദാസ്, അഡ്വ. ടി.എം വേലായുധന്‍, സി. ഇ. ചാക്കുണ്ണി എന്നിവരും വാര്‍ത്താസമ്മേളനത്തില്‍ സംബന്ധിച്ചു.