ശ്രീനഗര്‍: കശ്മിരിലെ ഷോപ്പിയാന്‍ ജില്ലയില്‍ തീവ്രവാദികളുമായുണ്ടായ ഏറ്റുമുട്ടലില്‍ പരുക്കേറ്റ ജവാന്‍ മരിച്ചു. ഗുരുതരമായി പരുക്കേറ്റ രോഹിത് കുമാര്‍ യാദവാണ് ആശുപത്രിയില്‍വച്ച് മരിച്ചതെന്ന് കശ്മിര്‍ പൊലിസ് വക്താവ് പറഞ്ഞു. ഹന്ദ്വയില്‍ കഴിഞ്ഞ ദിവസമാണ് തീവ്രവാദികളുമായി ഏറ്റുമുട്ടലുണ്ടായത്. മൂന്ന് തീവ്രവാദികളെ സൈന്യം വധിച്ചിരുന്നു. യാവര്‍ അഹമ്മദ് ദര്‍, ഷക്കീല്‍ അഹമ്മദ് ദര്‍, ഇഷ്തിയാഖ് ഭട്ട് എന്നിവരാണ് കൊല്ലപ്പെട്ടത്. മൂന്നുപേരും ഹിസ്ബുല്‍ മുജാഹിദീന്‍ അംഗങ്ങളാണ്.

കഴിഞ്ഞ ദിവസം തന്നെ പുല്‍വാമ ജില്ലയിലെ ദലിപോറയില്‍ ഭീകരരുമായുണ്ടായ ഏറ്റുമുട്ടലില്‍ സൈനികന്‍ കൊല്ലപ്പെട്ടിരുന്നു. മൂന്ന് ഭീകരരെ സൈന്യം വധിക്കുകയും ചെയ്തു. ഒരു പ്രദേശവാസിയും മരിച്ചിട്ടുണ്ട്. സന്ദീപാണ് വീരമൃത്യു വരിച്ച സൈനികന്‍. റഈസ് അഹമ്മദ് ധര്‍ ആണ് മരിച്ച ഗ്രാമീണന്‍. ഇയാളുടെ സഹോദരന്‍ മുഹമ്മദ് യൂനിസിന് പരുക്കേറ്റു. കരീമാബാദിലെ നസീര്‍ പണ്ഡിറ്റ്, ഷോപ്പിയാനിലെ ഉമര്‍ മിര്‍, പാക് വംശജനും ജെയ്‌ഷെ കമാന്‍ഡറുമായ ഖാലിദ് ഭായ് എന്നിവരാണ് കൊല്ലപ്പെട്ട ഭീകരര്‍. 2017ല്‍ ലാത്‌പോറയില്‍ സി.ആര്‍.പി.എഫ് ക്യാംപ് ആക്രമിച്ച് അഞ്ച് ജവാന്മാരെ കൊലപ്പെടുത്തിയ സംഭവത്തിലെ മുഖ്യപ്രതിയാണിയാള്‍.