പെരുമ്പാവൂര്‍: ഒട്ടേറെ വര്‍ഷങ്ങളായി കാടും കളകളും നിറഞ്ഞു നിന്ന ഒര്‍ണ പാടശേഖരത്ത് കുടുംബശ്രീക്കാരുടെ കൃഷിക്ക് നൂറുമേനി.
ആറ് ഏക്കര്‍ 20 സെന്റ് സ്ഥലത്ത് രണ്ട് ലക്ഷത്തോളം രൂപ മുടക്കിയാണ് നെന്മണി കുടുംബശ്രീക്കാര്‍ ഒത്തൊരുമയോടെ കൃഷിയിറക്കിയത്.നേരത്തെ നെല്ലും, പച്ചക്കറികളും ഇടവേളകളില്‍ കൃഷി ചെയ്തിരുന്ന പാടശേഖരത്ത് ഇത്തവണ കൃഷിയിറക്കിയത് പച്ചക്കറി മാത്രമാണ്.
വിവിധ വ്യക്തികളുടെ ഉടമസ്ഥതയിലുള്ള സ്ഥലത്താണ് ഇവര്‍ കൃഷിയിറക്കിയത്. പഞ്ചായത്ത് മെമ്പര്‍ എം.എം റഹീമും കൃഷി ഭവനും എല്ലാ സഹായവും നല്‍കി ഇവര്‍ക്കൊപ്പം നിന്നതും കൃഷി ഇറക്കാന്‍ കുടുംബശ്രീക്കാര്‍ക്കു പ്രചോദനമായി. വിളവെടുപ്പ് പഞ്ചായത്തംഗം എം.എം.റഹീം ഉദ്ഘാടനം ചെയ്തു.
ആദ്യ ദിനത്തില്‍ 100 കിലോപയര്‍, 60 കിലോ വെള്ളരി, 50 കിലോ വെണ്ടക്ക എന്നിവയാണു വിളവെടുത്തത്.
നെന്മണി കുടുംബശ്രീ യൂനിറ്റ് പ്രസിഡന്റ് ഹേനമണി, നബീസ മൈതീന്‍, പ്രിയങ്ക എന്നിവരുടെ നേതൃത്വത്തിലാണു കൃഷിയിറക്കിയത്.