തൊടുപുഴ: പുരാവസ്തുക്കള്‍ മോഷ്ടിച്ച കേസില്‍ സി.പി.എം ബ്രാഞ്ച് സെക്രട്ടറി അടക്കം അഞ്ചു പേര്‍ അറസ്റ്റില്‍. സി.പി.എം പന്നൂര്‍ ബ്രാഞ്ച് സെക്രട്ടറി കരിമണ്ണൂര്‍ പന്നൂര്‍ തെറ്റാമലയില്‍ വിഷ്ണു ബാബു (22), സമീപവാസികളും സുഹൃത്തുക്കളുമായ തച്ചാമഠത്തില്‍ പ്രശാന്ത്(24), പാറയ്ക്കല്‍ രാകേഷ് (കണ്ണന്‍-30), തച്ചാമഠത്തില്‍ സുധി(28), കാവാട്ടുകുന്നേല്‍ സനീഷ് തങ്കച്ചന്‍(19) എന്നിവരെയാണ് കരിമണ്ണൂര്‍ പൊലിസ് അറസ്റ്റ് ചെയ്തത്.
ജലസേചന വകുപ്പില്‍ നിന്ന് വിരമിച്ച ഉപ്പുകുന്ന് അറയ്ക്കല്‍ ജോണ്‍സന്റെ വീട്ടില്‍ കഴിഞ്ഞമാസം മാസം 19 നാണ് മോഷണം നടന്നത്. പ്രതികള്‍ ഒളിപ്പിച്ച് വച്ചിരുന്ന പുരാവസ്തുക്കളും മോഷണത്തിന് ഉപയോഗിച്ച രണ്ട് കാറുകളം ഒരു ഓട്ടോറിക്ഷയും രണ്ട് ബൈക്കുകളും പൊലിസ് പിടിച്ചെടുത്തു. പഴയ കറന്‍സികളും ഫലകങ്ങളും അടക്കമുള്ളവയാണ് മോഷണം പോയതെന്ന് പൊലിസ് പറഞ്ഞു.
കേസിലെ ഒന്നാം പ്രതി പ്രശാന്തിന് ഉടുമ്പന്നൂര്‍ മേഖലയില്‍ വ്യാപകമായി കഞ്ചാവ് കച്ചവടമുള്ളതായും ഇതിലടക്കം പ്രതികള്‍ക്കെല്ലാം പങ്കുള്ളതായും അന്വേഷണത്തില്‍ പൊലിസ് കണ്ടെത്തി. തൊടുപുഴ മേഖലയില്‍ നടന്ന മറ്റ് മോഷണ കേസുകളിലും ഇവര്‍ക്ക് പങ്കുണ്ടോ എന്നതും പരിശോധിച്ച് വരികയാണ്. പ്രശാന്തിന്റെ കൈവശത്തിലുണ്ടായിരുന്ന കാര്‍ സംഭവദിവസം മോഷണം നടന്ന വീടിന്റെ ഭാഗത്ത് എത്തിയതിന്റെ ദൃശ്യങ്ങള്‍ പരിസരപ്രദേശങ്ങളിലെ സി.സി.ടി.വി കളില്‍ നിന്നും പൊലിസിന് ലഭിച്ചിരുന്നു. പിന്നാലെ പ്രതികളെ തിരിച്ചറിഞ്ഞെങ്കിലും ഉന്നത സ്വാധീനത്തെ തുടര്‍ന്ന് അറസ്റ്റ് വൈകുകയായിരുന്നുവെന്ന് പറയപ്പെടുന്നു. പിന്നീട് വീട്ടുടമ ജോണ്‍സണ്‍ ഇക്കാര്യം പരിചയക്കാരനായ എസ്.പി കെ.ജി സൈമനെ അറിയിച്ചിരുന്നു. ഇതിന് ശേഷം പൊലിസ് അന്വേഷണം ശക്തിപ്പെടുത്തുകയും പ്രതികളെ പിടികൂടുകയുമായിരുന്നെന്നാണ് വിവരം.