കുന്നംകുളം: പ്രകൃതി ദത്തമായ സംവിധാനങ്ങള്‍ ഉപയോഗപെടുത്തി കുടിവെള്ള വിതരണം മെച്ചപെടുത്താന്‍ ജനകീയ ചര്‍ച്ചകളിലൂടെ ശാസ്ത്രീയവും ഫലവത്തുമായ പദ്ധതികള്‍ പ്രാവര്‍ത്തികമാക്കുമെന്ന് സഹകരണ ടൂറിസം വകുപ്പ് മന്ത്രി എ.സി മൊയ്തീന്‍ പറഞ്ഞു.
കുന്നംകുളം നഗരസഭ വികസന സെമിനാര്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജൂലൈ 31നകം മുഴുവന്‍ വീടുകളും വൈദ്യുതീകരിക്കണമെന്നാണ് സര്‍ക്കാര്‍ തീരുമാനം, അടിസ്ഥാന വികസന ശേഷി വര്‍ധിപ്പിക്കുക എന്നതാണ് സര്‍ക്കാരിന്റെ നയമെന്നും അദ്ദേഹം പറഞ്ഞു. ചെയര്‍പേഴ്‌സണ്‍ സീതാ രവീന്ദ്രന്‍ അധ്യക്ഷയായി.
എജിനീയര്‍ ജെ.ആര്‍ രാജ് പദ്ധതി വിശദീകരണം നടത്തി. 21 കോടി രൂപയുടെ പദ്ധതി രേഖകളാണ് 2016  17 വര്‍ഷത്തെ പദ്ധതി രേഖയില്‍ ഉള്‍കൊള്ളിച്ചിരിക്കുന്നത്. സ്പില്‍ ഓവര്‍ വര്‍ക്കുകള്‍ക്ക് പുറമെ 16 കോടി രൂപയുടെ നിര്‍മാണ പ്രവര്‍ത്തനങ്ങളാണ് ഉള്‍പെടുത്തിയിരിക്കുന്നത്.
288 പുതിയ പദ്ധതികളില്‍ പട്ടിക ജാതി വിഭാഗങ്ങള്‍ക്കുള്ള വീട് നിര്‍മാണത്തിന് ഒരു കോടി പതിനൊന്ന് ലക്ഷം രൂപയും, ടൗണ്‍ഹാള്‍ നവീകരണത്തിന് 62 88 500 രൂപയും, വകയിരുത്തിയിട്ടുണ്ട്. ആധുനിക അറവുശാല
നിര്‍മാണം, റോഡുകളുടെ നിര്‍മാണം പുനുരുദ്ധാരണം, ശിശുക്ഷേമം, മരുന്നുകള്‍, വിദ്യാഭ്യാസ മേഖലയുടെ നവീകരണം തുടങ്ങി അടിസ്ഥാന പാശ്ചാതലം, കാര്‍ഷികം എന്നീ മേഖലയില്‍ ഊന്നല്‍ നല്‍കിയാണ് വികസന രേഖ തയ്യാറാക്കിയിരിക്കുന്നത്.
 യോഗത്തില്‍ ഉയര്‍ന്നുവരുന്ന പുതിയ ആശയങ്ങള്‍ കൂടി ഉള്‍പ്പെടുത്തിയ ശേഷം രേഖ കൗണ്‍സില്‍ യോഗത്തില്‍ അവതരിപ്പിച്ചു പാസാക്കും.
വൈസ് ചെയര്‍മാന്‍ പി.എം സുരേഷ്, സ്ഥിരം സമിതി അംഗങ്ങളായ ഷാജി ആലിക്കല്‍, സുമ ഗംഗാധരന്‍, ഗീതാശശി, കെ.കെ മുരളി, മിഷ സെബാസ്റ്റ്യന്‍, സൂപ്രണ്ട് എം.കബീര്‍, സെക്രട്ടറി വി.സജികുമാര്‍ സംസാരിച്ചു. പദ്ധതി രേഖ സംബന്ധിച്ചുള്ള ചര്‍ച്ചകളും റിപ്പോര്‍ട്ടും കര്‍മ്മ സമിതി അവലോകനവും ക്രോഡീകരണവും ഉണ്ടായിരുന്നു.