ചാവക്കാട്: നറുക്കെടുപ്പില്‍  സമ്മാനമായി ലഭിച്ച കാര്‍ ജീവകാരുണ്യപ്രവര്‍ത്തനങ്ങള്‍ക്കായി തിരിച്ചുനല്‍കി മാതൃകയാവുകയാണ് ഷിഹാബ് എന്ന യുവാവ്.
ചാവക്കാട് ബീച്ച് യുവധാര കലാകായിക സാംസ്‌കാരിക വേദി വിഷുവിന്റെ ഭാഗമായി നടത്തിയ നറുക്കെടുപ്പ് മത്സരത്തില്‍ ഒന്നാംസമ്മാനം നേടിയ വിജയിയാണ് മടപ്പേന്‍ ഷിഹാബ്. പ്രമുഖ കമ്പനിയുടെ ലക്ഷങ്ങള്‍ വിലമതിക്കുന്ന കാറാണ് ഷിഹാബിന് സമ്മാനമായി ലഭിച്ചത്.
സമ്മാനമായി കാര്‍ ലഭിച്ച ചടങ്ങില്‍ തന്നെ തനിക്ക് ലഭിച്ച കാര്‍ ജീവകാരുണ്യപ്രവര്‍ത്തനങ്ങള്‍ക്ക് ഫണ്ട് സമാഹരിക്കുന്നതിനായി യുവധാര കലാകായിക സാംസ്‌കാരിക വേദിക്ക് തിരിച്ചുനല്‍കുകയാണെന്ന് ഷിഹാബ് പ്രഖ്യാപിച്ചിരുന്നു. ശനിയാഴ്ച യുവധാര സംഘടിപ്പിച്ച പരിപാടിയില്‍ ഷിഹാബ് കാറിന്റെ താക്കോല്‍ തിരിച്ചുനല്‍കി.
ചടങ്ങില്‍ കെ.വി. അബ്ദുള്‍ഖാദര്‍ എം.എല്‍.എ. ഷിഹാബിനെ പൊന്നാടയണിയിച്ച് ആദരിച്ചു.
നഗരസഭാ ചെയര്‍മാന്‍ എന്‍.കെ. അക്ബര്‍, വൈസ് ചെയര്‍പേഴ്‌സന്‍ മഞ്ജുഷ സുരേഷ്, വിദ്യാഭ്യാസ സ്റ്റാന്‍ഡിങ് കമ്മറ്റി ചെയര്‍മാന്‍ എ.സി. ആനന്ദന്‍,കൗണ്‍സിലര്‍മാരായ പി.ഡി.സുരേഷ് ബാബു,മഞ്ജുള ജയന്‍,യുവധാര സെക്രട്ടറി ഐ.എം. നൗഷാദ്,ദിലീപ് ചാവക്കാടന്‍,കെ.എം. അലി, എന്‍.വി. സോമന്‍, കെ.പി. പ്രജിത്ത് എന്നിവര്‍ സംസാരിച്ചു