ഹൈദരാബാദ്: വീട്ടുകാരുടെ എതിര്‍പ്പ് മറികടന്ന് വിവാഹം ചെയ്തതിന് യുവാവിനെ പെണ്‍കുട്ടിയുടെ വീട്ടുകാര്‍ തട്ടിക്കൊണ്ടുപോയി കൊലപ്പെടുത്തി. 28 കാരനായ ഹേമന്ത് വ്യാസ് എന്ന യുവാവാണ് കൊല്ലപ്പെട്ടത്.

ചന്ദനഗര്‍ നിവാസിയായ ഹേമന്ത് വ്യാസും അതേ പ്രദേശത്തെ താമസക്കാരിയായ അവന്തിയും ജൂണ്‍ 10 നാണ് വിവാഹിതരായത്. ഇവരുടെ പ്രണയം അറിഞ്ഞ അവന്തിയുടെ വീട്ടുകാരില്‍ നിന്നും നേരത്തെതന്നെ യുവാവിന് ഭീഷണിയുണ്ടായിരുന്നു.

വീട്ടുകാരറിയാതെ വിവാഹിതരായ ഇരുവരും ഹൈദരാബാദില്‍ വാടകയ്ക്ക് താമസിച്ചുവരികയായിരുന്നു. ഇതറിഞ്ഞ മാതാപിതാക്കള്‍ ഇവരെ കൊല്ലാന്‍ തീരുമാനിക്കുകയായിരുന്നു. സെപ്റ്റംബര്‍ 24-ന് അവന്തിയുടെ രണ്ടു അമ്മാവന്മാര്‍ ഇവരുടെ വീട്ടിലെത്തുകയും ഇരുവരേയും വലിച്ചിഴച്ച് കാറില്‍ കയറ്റി കൊണ്ടുപോവുകയും ചെയ്തു. വഴിയില്‍ വെച്ച് കാറുമാറി കയറുന്നതിനിടയില്‍ ഇവരുടെ കൈയില്‍ നിന്ന് രക്ഷപ്പെട്ട അവന്തി പൊലിസ് സ്റ്റേഷനിലെത്തി വിവരമറിയിക്കുകയായിരുന്നു. എന്നാല്‍ അപ്പോഴേക്കും ഹേമന്ത് കൊല്ലപ്പെട്ടിരുന്നു.

സംഭവത്തില്‍ അവന്തിയുടെ മാതാപിതാക്കളും സഹോദരനും ഉള്‍പ്പെടെ 14 പേരെ പൊലിസ് അറസ്റ്റ് ചെയ്തു.