പാലക്കാട്: കഴിഞ്ഞ സര്‍ക്കാരിന്റെ കാലത്ത് കട്ടപ്പുറത്തായ സര്‍വീസുകള്‍ പുനഃസ്ഥാപിച്ച് കെ.എസ്.ആര്‍.ടി.സി ജനകീയമാകുന്നു. രാത്രി സര്‍വീസ് ഉള്‍പ്പെടെ പുനഃസ്ഥാപിച്ചതിനാല്‍ യാത്രക്കാര്‍ക്ക് വലിയ ആശ്വാസമായി. നിലവില്‍ പല രാത്രി സര്‍വീസുകളും നിര്‍ത്തിയതിനാല്‍ കെ.എസ്.ആര്‍.ടി.സിയെ വിശ്വസിച്ച് സ്റ്റാന്‍ഡുകളിലെത്തുന്ന യാത്രക്കാര്‍ക്ക് മണിക്കൂറുകളോളം കാത്തിരിക്കേണ്ട അവസ്ഥയായിരുന്നു.
ജില്ലയിലെ വിവിധ ഡിപ്പോകളിലായി നിര്‍ത്തലാക്കിയ 11 സര്‍വീസുകള്‍ പുതിയ സര്‍ക്കാര്‍ അധികാരത്തില്‍ വന്ന ശേഷം പുനഃസ്ഥാപിച്ചു. പാലക്കാട് ആറ് സര്‍വീസുകളും മണ്ണാര്‍ക്കാട്, ചിറ്റൂര്‍ എന്നിവിടങ്ങളില്‍ രണ്ട് സര്‍വീസ് വീതവും വടക്കഞ്ചേരിയില്‍ ഒരു സര്‍വീസുമാണ് പുനഃസ്ഥാപിച്ചത്. സ്‌പെയര്‍ പാര്‍ട്‌സുകള്‍ ഇല്ലാത്തതിനാല്‍ കട്ടപ്പുറത്തായ ബസുകളാണ് നന്നാക്കി പുറത്തിറക്കിയത്. ഇതിനു പുറമെ നാല് ജെന്റം ബസുകളും പാലക്കാട് ഡിപ്പോയില്‍നിന്ന് സര്‍വീസ് പുനരാരംഭിച്ചു.
പാര്‍ട്‌സുകളില്ലെന്ന കാരണം പറഞ്ഞ് പാലക്കാട് ഡിപ്പോയില്‍ എയര്‍ കണ്ടീഷന്‍ ബസുള്‍പ്പെടെ കട്ടപ്പുറത്ത് കയറ്റിയിരുന്നു. ടയര്‍, ട്യൂബ് എന്നിവ യഥാക്രമം എത്തിക്കാതെയും ബസുകള്‍ സര്‍വീസ് നിര്‍ത്തി. ഇവയൊക്കെ എത്തിച്ച് സര്‍വീസുകള്‍ കാര്യക്ഷമമാക്കിയതോടെ യാത്രക്കാര്‍ക്ക് ആശ്വാസമായി.
ജീവനക്കാരും കെ.എസ്.ആര്‍.ടി.സിയെ സംരക്ഷിക്കാന്‍ ആവേശത്തോടെ മുന്നോട്ടു വന്നതിനാല്‍ ജനകീയ വല്‍ക്കരണത്തിന് കരുത്ത് പകര്‍ന്നു. 12ന് എല്ലാ ഗ്യാരേജിലും ജീവനക്കാര്‍ ശുചീകരണം നടത്തും. കെ.എസ്.ആര്‍.ടി.സി എംപ്ലോയീസ് അസോസിയേഷന്റെ (സിഐടിയു) നേതൃത്വത്തിലാണ് സംസ്ഥാന വ്യാപകമായി ശുചീകരണം നടത്തുക. കെ.എസ്.ആര്‍.ടി.സിയില്‍ ഏറ്റവും കൂടുതല്‍ ജീവനക്കാര്‍ അംഗമായ തൊഴിലാളി സംഘടനകൂടിയാണ് കെ.എസ്.ആര്‍.ടി.ഇ.എ. ജില്ലയില്‍ ഒരു യൂണിറ്റിനെ മാതൃകായൂണിറ്റായി ഏറ്റെടുത്ത് സര്‍വീസുകള്‍ കാര്യക്ഷമമാക്കുന്ന പദ്ധതിക്കും തുടക്കം കുറിക്കുകയാണ്.
ബസുകള്‍ കട്ടപ്പുറത്താകാതെ നോക്കുകയും വരുമാനം വര്‍ധിപ്പിക്കുകയും  കാര്യക്ഷമത കൂട്ടുകയുമാണ് ഇതിലൂടെ ലക്ഷ്യമിടുന്നത്. പാലക്കാട് ജില്ലയില്‍ മണ്ണാര്‍ക്കാട് ഡിപ്പോയെയാണ് മാതൃകാ യൂണിറ്റായി ഏറ്റെടുക്കുന്നത്. സംസ്ഥാന വ്യാപകമായി കെ.എസ്.ആര്‍.ടി.സിയുടെ വരുമാനം പ്രതിദിനം ഏഴ് കോടിയിലെത്തിക്കുക എന്ന ലക്ഷ്യം കൈവരിക്കാനാണ് ജീവനക്കാര്‍ ശ്രമിക്കുന്നത്. ഇപ്പോള്‍ 5.45കോടി രൂപയാണ് കെ.എസ്.ആര്‍.ടി.സിയുടെ പ്രതിദിന വരുമാനം. കട്ടപ്പുറത്തുള്ള എല്ലാ ബസ്സുകളും പുറത്തിറക്കുകയും ജീവനക്കാരുടെ ഒഴിവുകള്‍ നികത്തുകയും ചെയ്താല്‍ ലക്ഷ്യം കൈവരിക്കാന്‍ കഴിയുമെന്നാണ് ജീവനക്കാര്‍ പറയുന്നത്. ചില സ്വകാര്യ ബസുകള്‍ എസി സര്‍വീസ് നടത്തുന്നത് കെ.എസ്.ആര്‍.ടി.സിയുടെ വരുമാനത്തെ ബാധിക്കുന്നുണ്ടെന്നും പറയുന്നു.