കണ്ണൂര്‍: കേന്ദ്രസര്‍ക്കാരിന്റെ സ്വദേശി ദര്‍ശന്‍ സ്‌കീമില്‍ ഉള്‍പ്പെടുത്തി മലബാര്‍ ക്രൂ യിസ് ടൂറിസം പദ്ധതിക്ക് 80.37 കോടി രൂപ കേന്ദ്രടൂറിസം മന്ത്രാലയം അനുവദിച്ചതോടെ ഉത്തര മലബാറിന്റെ ടൂറിസം വികസനത്തിനൊപ്പം വിവിധ മേഖലകളിലെ ആയിരങ്ങള്‍ക്കു തൊഴില്‍സ്ഥിരതക്കും വഴിയൊരുങ്ങും. മയ്യഴിപ്പുഴയ്ക്കും ചന്ദ്രഗിരിപ്പുഴയ്ക്കും ഇടയിലുള്ള ജലാശയങ്ങളെ കൂട്ടിയിണക്കി വിനോദ സഞ്ചാര സാധ്യതകളുള്ള തീരപ്രദേശങ്ങളെ ഉപയോഗപ്പെടുത്തിയാണ് മലനാട് മലബാര്‍ ക്രൂയിസ് ടൂറിസം പദ്ധതി നടപ്പാക്കുന്നത്.
കണ്ണൂര്‍ ജില്ലയിലെ വളപട്ടണം, കുപ്പം പുഴകളിലൂടെ വിവിധ പ്രദേശങ്ങളിലായി മൂന്നു ജലയാത്രകളാണു പദ്ധതിയുടെ ഭാഗമായിവരുന്നത്. വളപട്ടണം മുതല്‍ മുനമ്പ് കടവ് വരെ 40 കിലോമീറ്റര്‍, മലബാര്‍ പാചക രീതി പ്രമേയമാക്കിയ മുത്തപ്പന്‍ ക്രൂയിസ്, വളപട്ടണം മുതല്‍ പഴയങ്ങാടി വരെ തെയ്യം പ്രമേയമാക്കിയുള്ള ക്രൂയിസ്, കുപ്പം പുഴയില്‍ പഴയങ്ങാടി മുതല്‍ കുപ്പം വരെ കണ്ടല്‍ക്കാട് ജലയാത്ര എന്നിവയാണു പദ്ധതിക്ക് കീഴില്‍വരുന്നത്. പാസഞ്ചര്‍ ടെര്‍മിനലുകള്‍, ബോട്ട് ടെര്‍മിനലുകള്‍, ബോട്ട്‌ജെട്ടികള്‍, വള്ളംകളി കാണാനുള്ള ഗാലറി, റസ്റ്റോറന്റുകള്‍, ഓപ്പണ്‍ എയര്‍ തിയറ്ററുകള്‍, ബയോ ടോയ്‌ലറ്റുകള്‍, കുടിവെള്ള സൗകര്യങ്ങള്‍, നാടന്‍ വിഭവങ്ങള്‍ വില്‍ക്കുന്ന മാര്‍ക്കറ്റുകള്‍, കരകൗശല സ്റ്റാളുകള്‍, സൈക്കിള്‍ ട്രാക്കുകള്‍, സോളാര്‍ വിളക്കുകള്‍, സി.സി ടി.വി തുടങ്ങിയ സൗകര്യങ്ങള്‍ പദ്ധതിയുടെ ഭാഗമായി ഒരുക്കും.
സംസ്ഥാന ടൂറിസം വകുപ്പ് മുന്‍െൈകയെടുത്ത് കേന്ദ്രസര്‍ക്കാരിന് നല്‍കിയ പ്രൊജക്ട് പ്രൊപ്പോസല്‍ കേന്ദ്രടൂറിസം വകുപ്പിന്റെ പരിഗണനയിലായിരുന്നു. ഈവിഷയം ലോക്‌സഭയില്‍ ഉന്നയിച്ചപ്പോള്‍ പദ്ധതിക്ക് ഉടന്‍ അംഗീകാരം നല്‍കുമെന്നു കേന്ദ്രടൂറിസം വകുപ്പ് മന്ത്രി അല്‍ഫോന്‍സ് കണ്ണന്താനം പി.കെ ശ്രീമതി എം.പിയെ അറിയിച്ചിരുന്നു.