ന്യൂഡല്‍ഹി: നടന്‍ സുശാന്ത് സിങ് രാജ്പുത്ത് തൂങ്ങി മരിച്ചതാണെന്ന് എയിംസ് മെഡിക്കല്‍ ബോഡിന്റെ കണ്ടെത്തല്‍. ഇതു സംബന്ധിച്ച റിപ്പോര്‍ട്ട് കേസ് അന്വേഷിക്കുന്ന സി.ബി.ഐയ്ക്ക് ഉടന്‍ കൈമാറുമെന്ന് എയിംസ് ഫോറന്‍സിക് മെഡിക്കല്‍ ബോര്‍ഡ് ചെയര്‍മാന്‍ ഡോ. സുധീര്‍ ഗുപ്ത പറഞ്ഞു.

സുശാന്ത് സിങ്ങിനെ കൊലപ്പെടുത്തിയതാണെന്ന വാദമാണ് എയിംസ് മെഡിക്കല്‍ ബോഡ് തള്ളിക്കളഞ്ഞിരിക്കുന്നത്. എയിംസിലെ ഫോറന്‍സിക് വിദഗ്ധര്‍ ഉള്‍പ്പെടുന്ന ആറംഗ സംഘമാണ് ഇതു സംബന്ധിച്ച് അന്വേഷണം നടത്തിയത്.

തൂങ്ങി മരിക്കുമ്പോഴുണ്ടാകുന്ന മുറിവുകളല്ലാതെ ശരീരത്തില്‍ മറ്റു പരുക്കുകളൊന്നുമില്ലായിരുന്നുവെന്ന് ഗുപ്്ത പറഞ്ഞു. പിടിവലിയുണ്ടായതിന്റെയോ ബലപ്രയോഗത്തിന്റെയോ ലക്ഷണങ്ങളൊന്നുമില്ലായിരുന്നുവെന്നും ഗുപ്ത ചൂണ്ടിക്കാട്ടി. ജൂണ്‍ 14നാണ് 34കാരനായ സുശാന്ത് സിങ്ങിനെ മുംബൈ സബര്‍ബന്‍ ബാന്ദ്രയിലെ ഫഌറ്റില്‍ തൂങ്ങി മരിച്ച നിലയില്‍ കണ്ടെത്തിയത്.