നെടുമ്പാശേരി: ടി.വി സ്റ്റാന്റിന്റെ ഫ്രെയിമിനകത്ത് ഒളിപ്പിച്ച് കടത്താന്‍ ശ്രമിച്ച ഒരു കിലോഗ്രാം സ്വര്‍ണം നെടുമ്പാശേരി വിമാനത്താവളത്തിലെ എയര്‍ കസ്റ്റംസ് ഇന്റലിജന്‍സ് വിഭാഗം പിടിച്ചെടുത്തു.
എയര്‍ ഇന്ത്യ വിമാനത്തില്‍ ദോഹയില്‍ നിന്നും എത്തിയ മലപ്പുറം സ്വദേശിയായ യാത്രക്കാരനാണ് പിടിയിലായത്.
ഒന്നര ഇഞ്ച് വീതിയുള്ള പട്ടയുടെ രൂപത്തിലാണ് 999.5 ഗ്രാം സ്വര്‍ണം ടി.വി സ്റ്റാന്റിന്റെ ഫ്രെയിമിനകത്ത് ഒളിപ്പിച്ചിരുന്നത്. ഇതിന് 32 ലക്ഷം രൂപ വില വരും.
തുടര്‍ച്ചയായ രണ്ടാം ദിവസമാണ് അനധികൃതമായി കടത്താന്‍ ശ്രമിച്ച സ്വര്‍ണം നെടുമ്പാശേരിയില്‍ പിടികൂടുന്നത്. ഒരു കോടിയിലധികം രൂപ വിലവരുന്ന മൂന്നേകാല്‍ കിലോഗ്രാം സ്വര്‍ണം കടത്താന്‍ ശ്രമിക്കുന്നതിനിടെ വെള്ളിയാഴ്ച രണ്ടുപേര്‍ വിമാനത്താവളത്തില്‍ ഡി.ആര്‍.ഐയുടെ പിടിയിലായിരുന്നു.
ദുബൈയില്‍ നിന്നും സ്വര്‍ണം കൊണ്ടുവന്ന മലപ്പുറം എളങ്കൂര്‍ സ്വദേശി മുഹമ്മദ് അശ്‌റഫ്, സ്വര്‍ണക്കടത്ത് സംഘത്തിന്റെ സഹായിയായി പ്രവര്‍ത്തിച്ച വിമാനത്താവളത്തിലെ ഗ്രൗണ്ട് ഹാന്റലിങ് ഏജന്‍സി സൂപ്പര്‍വൈസര്‍ കരിയാട് സ്വദേശി ജോസ് പോള്‍ എന്നിവരാണ് പിടിയിലായിരുന്നത്.
എറണാകുളം സാമ്പത്തിക കുറ്റാന്വേഷണ കോടതിയില്‍ ഹാജരാക്കിയ ഇവരെ 14 ദിവസത്തേക്ക് റിമാന്‍ഡ് ചെയ്തു.