കോഴിക്കോട്: കോര്‍പറേഷന്‍ സ്റ്റേഡിയത്തില്‍ നടക്കുന്ന ജില്ലാ ബി ഡിവിഷന്‍ ഫുട്‌ബോള്‍ ലീഗ് ചാംപ്യന്‍ഷിപ്പില്‍ ഇന്നലെ നടന്ന മത്സരത്തില്‍ കാലിക്കറ്റ് യങ്‌സ്റ്റേഴ്‌സ് ക്ലബ് ഏകപക്ഷീയമായ ഒരു ഗോളിന് എഫ്.സി കാലിക്കറ്റിനെ പരാജയപ്പെടുത്തി. 48-ാം മിനുറ്റില്‍ അതുല്‍ ഗോള്‍ സ്‌കോര്‍ ചെയ്തു. രണ്ടാമത്തെ മത്സരത്തില്‍ ബ്രീസ് സ്‌പോര്‍ട്‌സ് ക്ലബ് എതിരില്ലാത്ത രണ്ടു ഗോളുകള്‍ക്ക് സെപ്റ്റിനെ പരാജയപ്പെടുത്തി. 20-ാം മിനുട്ടില്‍ ഗുല്‍ഫാനും 69-ാം മിനുട്ടില്‍ സര്‍ഫീനും ഗോള്‍ സ്‌കോര്‍ ചെയ്തു.
ദേവഗിരി കോളജില്‍ നടക്കുന്ന ജില്ലാ ഇ ഡിവിഷന്‍ ഫുട്‌ബോള്‍ ലീഗ് ചാംപ്യന്‍ഷിപ്പില്‍ എം.ജി.എം സ്‌പോര്‍ട്‌സ് അക്കാദമി എതിരില്ലാത്ത രണ്ടു ഗോളുകള്‍ക്ക് വിസ്ഡം സ്‌പോര്‍ട്‌സ് അക്കാദമിയെ പരാജയപ്പെടുത്തി. മൂന്ന്, 21 മിനുട്ടുകളില്‍ അന്‍ഷാദ് ഗോള്‍ സ്‌കോര്‍ ചെയ്തു. രണ്ടാമത്തെ മത്സരത്തില്‍ മര്‍ച്ചന്റ് സ്‌പോര്‍ട്‌സ് ക്ലബ് ഒന്നിനെതിരേ രണ്ടു ഗോളുകള്‍ക്ക് നായനാര്‍ സ്‌പോര്‍ട്‌സ് ക്ലബിനെ പരാജയപ്പെടുത്തി.
മര്‍ച്ചന്റ് ക്ലബിന് വേണ്ടി 13-ാം മിനുട്ടില്‍ ലബീബും 40-ല്‍ ഇഷാന്തും നായനാര്‍ ക്ലബിന് വേണ്ടി 21-ല്‍ വിമലും ഗോള്‍ സ്‌കോര്‍ ചെയ്തു.