സുഹൃത്ത് കസ്റ്റഡിയില്‍

തിരുവമ്പാടി: കൂടരഞ്ഞി കക്കാടംപൊയില്‍ കരിമ്പുകോളനിക്ക് സമീപം ആദിവാസി യുവാവിനെ കൊല്ലപ്പെട്ട നിലയില്‍ കണ്ടെത്തി. അരീക്കോട് വെറ്റിലപ്പാറ ഓടക്കയം പന്ന്യാര്‍മല കോളനിയിലെ ഹരിദാസനെയാണ്(30)കൊല്ലപ്പെട്ട നിലയില്‍ കണ്ടെത്തിയത്.
ഇന്നലെ രാവിലെ ആറിന് പ്രദേശവാസികളാണ് രക്തം വാര്‍ന്നൊലിക്കുന്ന നിലയില്‍ മൃതദേഹം കണ്ടെത്തിയത്. കക്കാടംപൊയിലിലെ ബന്ധുവിന്റെ വീട്ടില്‍ മരണാനന്തര ചടങ്ങുകള്‍ക്കെത്തിയതായിരുന്നു ഹരിദാസന്‍.

പൊലിസ്, ഫോറന്‍സിക് വിദഗ്ധര്‍ നടത്തിയ പരിശോധനയില്‍ തലയില്‍ ആഴത്തിലുള്ള മുറിവുകള്‍ കണ്ടെത്തി.
പൊലിസ് കേസെടുത്ത് അന്വേഷണം തുടങ്ങി.

അതിനിടെ, കഴിഞ്ഞ ശനിയാഴ്ച രാത്രിയോടെ പ്രദേശത്തുനിന്ന് കാണാതായ ഹരിദാസന്റെ സുഹൃത്ത് രാജേഷിനെ തിരുവമ്പാടി പൊലിസ് കസ്റ്റഡിയിലെടുത്തു. ഇയാള്‍ക്ക് സംഭവവുമായി ബന്ധമുണ്ടെന്ന സംശയമാണ് പൊലിസ് പ്രകടിപ്പിക്കുന്നത്.
സുജിതയാണ് ഹരിദാസന്റെ ഭാര്യ. അഞ്ചുമാസം പ്രായമുള്ള ആണ്‍കുട്ടിയുണ്ട്. സഹോദരങ്ങള്‍: രാജന്‍, സുചിത്ര.