മുക്കം: പ്രമുഖ പണ്ഡിതനും ആലിന്‍തറ അല്‍ ജാമിഅ അല്‍ ഹനീഫിയ്യ അല്‍ റബ്ബാനിയ്യ സ്ഥാപന സമുച്ഛയങ്ങളുടെ സ്ഥാപകനുമായ ആലിന്‍തറ ടി.സി അബ്ദുല്ല മുസ്‌ലിയാര്‍ (63) നിര്യാതനായി.

കോഴിക്കോട് ജില്ലയിലെ എന്‍.ഐ.ടിക്കടുത്ത് വെണ്ണക്കോട് നെടിയടത്ത് തടായില്‍ അബ്ദുറഹിമാന്റെ മകനായ അബ്ദുല്ല മുസ്‌ലിയാര്‍ നാട്ടിലും പരിസരങ്ങളിലുമായാണ് മതപഠനം പൂര്‍ത്തീകരിച്ചത്. ഇരുപത്തിയഞ്ചാം വയസില്‍ പട്ടിക്കാട് ജാമിഅ നൂരിയ്യ അറബിക് കോളജില്‍ നിന്ന് ഉപരിപഠനം പൂര്‍ത്തിയാക്കി.

19-ാം വയസില്‍ ശൈഖ് കോയഞ്ഞി കോയ അദ്ഹല്‍ (മമ്പാട്), ഖാദിരിയ്യത്തുല്‍ അലവിയ്യത്തുല്‍ ഹൈദ്രൂസിയ്യ, രിഫാഇയ്യ എന്നീ ത്വരീഖത്തുകളും ശൈഖ് സയ്യിദ് മഹ്മൂദ് ഹിബത്തുല്ലാഹില്‍ ബുഖാരി (ചാവക്കാട്) എന്നവരില്‍ നിന്ന് ഖാദിരിയ ഖിര്‍ഖയും ശൈഖ് കക്കിടിപ്പുറം അബൂബക്കര്‍ വലിയ്യുല്ലാഹിയില്‍ നിന്ന് ശാദുലി പ്രാരംഭ വിര്‍ദുകളും സ്വീകരിച്ചു.

ഇരുപത്തിയൊന്നാം വയസില്‍ നാട്ടില്‍ ഖാസിയായി നിയമിക്കപ്പെട്ടു. ഉപരിപഠന ശേഷം നെല്ലിക്കുത്ത്, മൂരിയാട് (കല്ലായി), വെള്ളിപറമ്പ്, പറമ്പില്‍പള്ളി എന്നിവിടങ്ങളില്‍ മുദരിസായി സേവനം അനുഷ്ഠിച്ചിട്ടുണ്ട്.