ന്യൂഡല്‍ഹി: ഗുജറാത്ത് നിയമസഭാതെരഞ്ഞെടുപ്പില്‍ വിവിപാറ്റ് യന്ത്രം ഉപയോഗിക്കുന്നതു സംബന്ധിച്ച് സുപ്രിംകോടതി കേന്ദ്രസര്‍ക്കാരിന്റെയും കേന്ദ്ര തെരഞ്ഞെടുപ്പ് കമ്മിഷന്റെയും നിലപാട് ആരാഞ്ഞു.
ഇതുസംബന്ധിച്ച് ചീഫ് ജസ്റ്റിസ് ജെ.എസ് ഖെഹാര്‍, ജസ്റ്റിസുമാരായ ഡി.വൈ ചന്ദ്രചൂഡ്, എസ്.കെ കൗള്‍ എന്നിവരടങ്ങിയ മൂന്നംഗ ബെഞ്ച് കേന്ദ്രത്തിനും ഗുജറാത്ത് സര്‍ക്കാരിനും തെരഞ്ഞെടുപ്പു കമ്മിഷനും നോട്ടിസയച്ചു. നാലാഴ്ചയ്ക്കുള്ളില്‍ നിലപാട് അറിയിക്കാനാണ് നോട്ടിസില്‍ ആവശ്യപ്പെട്ടിരിക്കുന്നത്.
ഈ വര്‍ഷാവസാനം സംസ്ഥാനത്ത് നടക്കാനിരിക്കുന്ന നിയമസഭാതെരഞ്ഞെടുപ്പില്‍ ബാലറ്റ് പേപ്പറോ വിവിപാറ്റ് യന്ത്രമോ ഉപയോഗിക്കണമെന്നാവശ്യപ്പെട്ട് ഗുജറാത്ത് സ്വദേശിയും പട്ടേല്‍ സംവരണ സമിതി നേതാവുമായ രേശ്മ വിദഭായ് പട്ടേലിന്റെ ഹരജിയിലാണ് സുപ്രിംകോടതി നടപടി.
ഇതേ ആവശ്യം ഉന്നയിച്ച് രേശ്മ ഗുജറാത്ത് ഹൈക്കോടതിയെ സമീപിച്ചെങ്കിലും കഴിഞ്ഞമാസം 12ന് ഹരജി തള്ളുകയായിരുന്നു. ഇതേതുടര്‍ന്നാണ് ഹരജി സുപ്രിംകോടതി മുമ്പാകെ എത്തിയത്.