മുംബൈ: പ്രധാനമന്ത്രി നരേന്ദ്രമോദി മാനസികമായി പരാജയം സമ്മതിച്ചതിന് തെളിവാണ് അദ്ദേഹത്തിന്റെ കഴിഞ്ഞ ദിവസത്തെ വാര്‍ത്താസമ്മേളനമെന്ന് മഹാരാഷ്ട്ര നവനിര്‍മാണ്‍സേനാ നേതാവ് രാജ് താക്കറെ.
മാധ്യമപ്രവര്‍ത്തകരുടെ ചോദ്യത്തിന് നരേന്ദ്രമോദി ഉത്തരം നല്‍കാതിരുന്നത് തെരഞ്ഞെടുപ്പില്‍ തോല്‍വി സമ്മതിച്ചതിന്റെ ലക്ഷണമാണ്. വാര്‍ത്താസമ്മേളനമല്ല 'മൗന്‍ കീ ബാത്ത്' ആണ് നടന്നതെന്നും രാജ് താക്കറെ പരിഹസിച്ചു. അമിത് ഷാ എല്ലാ കാര്യങ്ങളും പറയുമായിരുന്നെങ്കില്‍ പ്രധാനമന്ത്രി എന്തിനാണ് വാര്‍ത്താസമ്മേളനത്തില്‍ വന്ന് ഇരുന്നത്. അഞ്ചുവര്‍ഷം താന്‍ ചെയ്തതിനെ കുറിച്ച് മാധ്യമപ്രവര്‍ത്തകരുടെ ചോദ്യത്തിന് ഉത്തരം പറയാന്‍ കഴിഞ്ഞില്ലെങ്കില്‍ അത് അദ്ദേഹം പരാജയം സമ്മതിച്ചുവെന്നതിന്റെ തെളിവാണ്'- രാജ് താക്കറെ പറഞ്ഞു.