മൊഹാലി: ഗുജറാത്ത് ലയണ്‍സിനെതിരായ ഹോം പോരാട്ടത്തില്‍ കിങ്‌സ് ഇലവന്‍ പഞ്ചാബ് ആറ് വിക്കറ്റിന് തോല്‍വി വഴങ്ങി. ആദ്യം ബാറ്റ് ചെയ്ത പഞ്ചാബ് നിശ്ചിത 20 ഓവറില്‍ മൂന്ന് വിക്കറ്റ് നഷ്ടത്തില്‍ 189 റണ്‍സെടുത്തു. മറുപടി പറഞ്ഞ ഗുജറാത്ത് 19.4 ഓവറില്‍ നാല് വിക്കറ്റ് നഷ്ടത്തില്‍ 192 റണ്‍സെടുത്ത് വിജയമുറപ്പിക്കുകയായിരുന്നു. മികച്ച ബാറ്റിങ് പുറത്തെടുത്ത ഓപണര്‍ ഡ്വെയ്ന്‍ സ്മിത്ത് 39 പന്തില്‍ എട്ട് ഫോറും നാല് സിക്‌സും പറത്തി 74 റണ്‍സെടുത്ത് ഗുജറാത്തിന് വിജയാടിത്തറയിട്ടു. നായകന്‍ റെയ്‌ന (39), ദിനേഷ് കാര്‍ത്തിക് (പുറത്താകാതെ 35), ഇഷാന്‍ കിഷന്‍ (29) എന്നിവരും നിര്‍ണായക സംഭാവന നല്‍കി.
നേരത്തെ സീസണിലെ രണ്ടാം സെഞ്ച്വറി കുറിച്ച് ദക്ഷിണാഫ്രിക്കന്‍ താരം ഹാഷിം അംല മികച്ച പ്രകടനം പുറത്തെടുത്തതാണ് പാഞ്ചബിന് കരുത്തായത്. ടോസ് നേടി ഗുജറാത്ത് പഞ്ചാബിനെ ബാറ്റിങിനയക്കുകയായിരുന്നു. മാര്‍ട്ടിന്‍ ഗുപ്റ്റിലിനെ തുടക്കത്തില്‍ തന്നെ നഷ്ടമായെങ്കിലും പിന്നാലെയെത്തിയ ഷോണ്‍ മാര്‍ഷ് അംലയ്ക്ക് കൂട്ടായതോടെ സ്‌കോര്‍ ബോര്‍ഡില്‍ റണ്‍സൊഴുകി. അംല 60 പന്തില്‍ എട്ട് ഫോറും അഞ്ച് സിക്‌സും പറത്തി 102 റണ്‍സ് കണ്ടെത്തി. മാര്‍ഷ് ആറ് ഫോറുകളുടെ അകമ്പടിയില്‍ 58 റണ്‍സ് കണ്ടെത്തി. നായകന്‍ മാക്‌സ്‌വെല്‍ പുറത്താകാതെ 11 പന്തില്‍ 20 റണ്‍സെടുത്തു. ഗുജറാത്തിനായി സംഗ്‌വാന്‍, ധവാല്‍ കുല്‍ക്കര്‍ണി, ബേസില്‍ തമ്പി എന്നിവര്‍ ഓരോ വിക്കറ്റ് വീഴ്ത്തി. 11 മത്സരങ്ങള്‍ പൂര്‍ത്തിയാക്കിയ പഞ്ചാബ് അഞ്ച് വിജയമാണ് സ്വന്തമാക്കിയിട്ടുള്ളത്. ഇനിയുള്ള മൂന്ന് മത്സരങ്ങള്‍ വിജയിക്കുകയും മറ്റ് ടീമുകളുടെ സാധ്യതകളെ ആശ്രയിച്ചുമാണ് പഞ്ചാബിന്റെ പ്ലേയോഫ് സാധ്യത നിലനില്‍ക്കുന്നത്.