തിരുവനന്തപുരം: ലഹരിമരുന്ന് കടത്തുകേസിലെ പ്രതിക്ക് പണം നല്‍കിയതുമായി ബന്ധപ്പെട്ട് എന്‍ഫോഴ്‌സ്‌മെന്റിന്റെ ചോദ്യം ചെയ്യലിന് വിധേയനാകാന്‍ ബിനീഷ് കോടിയേരി ബെംഗളൂരുവിന് പുറപ്പെട്ടു. രണ്ടു സുഹൃത്തുക്കള്‍ക്കൊപ്പം രാവിലെ പത്തിന് തിരുവനന്തപുരം വിമാനത്താവളത്തില്‍ നിന്നാണ് ബെംഗളുരുവിന് തിരിച്ചത്.

ആറിന് ബംഗളൂരു ശാന്തിനഗറിലെ ഇ.ഡി ഓഫിസില്‍ ഹാജരാകാനാണ് ബിനീഷിന് നിര്‍ദ്ദേശം നല്‍കിയത്. ബംഗളൂരു മയക്കുമരുന്ന് കേസില്‍ എന്‍.സി.ബി അറസ്റ്റ് ചെയ്ത അനൂപ് മുഹമ്മദിന്റെ മൊഴികളുടെ അടിസ്ഥാനത്തിലാണ് ബിനീഷിനെയും ചോദ്യംചെയ്യുന്നത്. ബംഗളൂരുവിലെ ഹോട്ടല്‍ ബിസിനസിന് അടക്കം ബിനീഷ് വലിയ തുക നല്‍കിയിരുന്നതായി അനൂപ് നേരത്തെ മൊഴിനല്‍കിയിരുന്നു. ഇക്കാര്യം ബിനീഷ് കോടിയേരിയും സ്ഥിരീകരിച്ചിരുന്നു.
ബംഗളൂരു ലഹരിമരുന്ന് കേസില്‍ അറസ്റ്റിലായി ജയിലില്‍ കഴിയുന്ന അനൂപിനെ കഴിഞ്ഞയാഴ്ചയാണ് ഇ.ഡി വിശദമായി ചോദ്യംചെയ്തത്. കോടതിയുടെ അനുമതിയോടെ പരപ്പന അഗ്രഹാര ജയിലിലെത്തിയായിരുന്നു ചോദ്യംചെയ്യല്‍.