മാനന്തവാടി: കനത്ത വേനല്‍ചൂടില്‍ നിന്നും രൂക്ഷമായ കുടിവെള്ളക്ഷാമത്തില്‍ നിന്നും പലഭാഗങ്ങളിലും താല്‍ക്കാലികാശ്വാസം. സാധാരണ വേനല്‍ മഴയെക്കാള്‍ കഴിഞ്ഞ വാരം 65 ശതമാനവും കഴിഞ്ഞ രണ്ട് മാസത്തിനിടെ 21 ശതമാനവും വര്‍ധന ലഭിച്ചതായാണ് കാലാവസ്ഥാ നിരീക്ഷണകേന്ദ്രത്തിന്റെ കണക്കുകള്‍. കഴിഞ്ഞ വര്‍ഷം ജില്ലയില്‍ കാലവര്‍ഷത്തിലുണ്ടായ ഗണ്യമായ കുറവ് ഈവര്‍ഷം കടുത്ത ചൂടിനും വരള്‍ച്ചക്കും ഇടയാക്കിയിരുന്നു. ഫെബ്രുവരി, മാര്‍ച്ച് മാസങ്ങളില്‍ ജില്ലയില്‍ മുന്‍പെങ്ങുമില്ലാത്ത വിധം അന്തരീക്ഷ ഊഷ്മാവ് വര്‍ധിച്ചിരുന്നു. എന്നാല്‍ മാര്‍ച്ച് അവസാനം മുതല്‍ ജില്ലക്ക് ലഭ്യമായിത്തുടങ്ങിയ വേനല്‍മഴ നിത്യേനയെന്നോണം ജില്ലയുടെ വിവിധ ഭാഗങ്ങളില്‍ മുടങ്ങാതെ ലഭിക്കുന്നുണ്ട്.
വൈത്തിരി താലൂക്കിലെ വിവിധ ഭാഗങ്ങളില്‍ വേനല്‍മഴ ഏറ്റവും കൂടുതല്‍ ലഭിച്ചപ്പോള്‍ തവിഞ്ഞാല്‍, തൊണ്ടര്‍നാട് പഞ്ചായത്തുകളില്‍ മഴ നന്നേകുറഞ്ഞു. മുന്‍വര്‍ഷത്തെ അപേക്ഷിച്ച് ഈവര്‍ഷം കൂടിയ വേനല്‍മഴ ലഭിച്ചതായാണ് തിരുവനന്തപുരം കാലാവസ്ഥാ നിരീക്ഷണ കേന്ദ്രം കണക്കുകള്‍ സൂചിപ്പിക്കുന്നത്. 2016ല്‍ മാര്‍ച്ച് മുതല്‍ മെയ് 31 വരെ ജില്ലയില്‍ ലഭിച്ച വേനല്‍ മഴ 145.3 മില്ലി മീറ്റര്‍ ആയിരുന്നു. 275.4 മില്ലിമീറ്റര്‍ ലഭിക്കേണ്ട സ്ഥാനത്ത് 47 ശതമാനം കുറവായിരുന്നു മുന്‍ വര്‍ഷം ലഭിച്ചത്. എന്നാല്‍ ഈ വര്‍ഷം മാര്‍ച്ച് ഒന്ന് മുതല്‍ മെയ് അഞ്ചു വരെയുള്ള കണക്ക് പ്രകാരം ജില്ലയില്‍ 135.2 മില്ലിമീറ്റര്‍ മഴ ലഭിച്ചു. 112.1 മില്ലി മീറ്റര്‍ മഴയാണ് ഈ കാലയളവില്‍ ലഭിക്കേണ്ടത്. അതായത് വേനല്‍ മഴയില്‍ 21 ശതമാനത്തിന്റെ അധികമഴ ഇതിനോടകം ലഭ്യമായി. കഴിഞ്ഞ ഒരാഴ്ച മാത്രം 24.5 മില്ലിമീറ്റര്‍ മഴ ലഭിക്കേണ്ട ജില്ലയില്‍ 40.3 മില്ലി മീറ്റര്‍ മഴ ലഭിച്ചത് 65 ശതമാനം മഴയുടെ വര്‍ധനവാണ് കണക്കാക്കിയത്. ജനുവരി ഒന്ന് മുതല്‍ ഫെബ്രുവരി 28 വരെയുള്ള ശൈത്യകാലത്ത് ജില്ലയില്‍ 11 ശതമാനം മഴയാണ് കൂടുതലായി ലഭിച്ചത്.
കഴിഞ്ഞ കാലവര്‍ഷം തുടങ്ങിയ ജൂണ്‍ ഒന്നു മുതല്‍ ഡിസംബര്‍ 31 വരെ 64 ശതമാനം മഴകുറവ് വന്നത് ഏറെ ഭീതിയോടെയായിരുന്നു കാലാവസ്ഥാ നിരീക്ഷകര്‍ നോക്കികണ്ടത്. ഇതുകാരണം ഈ വര്‍ഷം ചൂട് കൂടുമെന്നും കുടിവെള്ളക്ഷാമം രൂക്ഷമാവുമെന്നും സൂര്യാഘാതം പോലുള്ള അപകടങ്ങള്‍ക്കും ഇടയാക്കുമെന്നും ഭയപ്പെട്ടിരുന്നു. എന്നാല്‍ പ്രതീക്ഷക്കപ്പുറത്ത് ലഭിച്ച വേനല്‍മഴ ഉയര്‍ന്ന ചൂടില്‍ നിന്നും സൂര്യാഘാതം പോലുള്ള അപകടങ്ങളില്‍ നിന്നും ജില്ലക്ക് തുണയായി. കടുത്ത വെള്ളക്ഷാമത്തിന് മഴവെള്ളം സംഭരിച്ചും നേരിയ പരിഹാരമുണ്ടായി. വരുംനാളുകളില്‍ വേനല്‍മഴ തുടരുമെന്ന കാലാവസ്ഥാ പ്രവചനം ഫലിച്ചാല്‍ കടുത്തവരള്‍ച്ചയില്‍ നിന്നും ജില്ലയിലെ ഭൂരിഭാഗം പ്രദേശങ്ങളും മോചിതമാവുമെന്നാണ് പ്രതീക്ഷ.