കോട്ടയം: കെവിന്‍ വധക്കേസിലെ സാക്ഷിയെ മര്‍ദിച്ച പ്രതികളുടെ ജാമ്യം കോട്ടയം പ്രിന്‍സിപ്പല്‍ സെഷന്‍സ് കോടതി റദ്ദാക്കി.
കോടതിയില്‍ സാക്ഷി പറയരുതെന്നാവശ്യപ്പെട്ട് 37ാം സാക്ഷി രാജേഷിനെയാണ് ആറാംപ്രതി മനുവും 13ാം പ്രതി ഷാനുവും മറ്റു രണ്ടുപേരും ചേര്‍ന്ന് മര്‍ദിച്ചത്. കറവൂര്‍ സ്വദേശി ഷാജഹാന്‍, തൊളിക്കോട് കാഞ്ഞിരംവിള വീട്ടില്‍ റോബിന്‍ എന്നിവരാണ് മറ്റുരണ്ടുപേര്‍. ഇവരെ പൊലിസ് അറസ്റ്റ് ചെയ്തു.
ഞായറാഴ്ച രാത്രി 8.30ഓടെ പുനലൂര്‍ മാര്‍ക്കറ്റ് ജങ്ഷന് സമീപത്തായിരുന്നു സംഭവം. കെവിനെയും അനീഷിനെയും തട്ടിക്കൊണ്ടുപോയ കാര്യം 11ാം പ്രതി തന്നോട് പറഞ്ഞിരുന്നുവെന്നും രാജേഷ് കോടതിയില്‍ മൊഴി നല്‍കി. രാജേഷ് ഉള്‍പ്പെടെ ആറ് സാക്ഷികളെയാണ് ഇന്ന് കോടതി വിസ്തരിച്ചത്. കെവിന്‍ വധക്കേസിലെ പ്രതികളായ ഫസില്‍, ഷിനു, ഷെഫിന്‍ എന്നിവരുടെ സുഹൃത്താണ് കേസിലെ 37ാം സാക്ഷിയായ രാജേഷ്.
ഒളിവില്‍ കഴിയുന്നതിനിടെ 11ാം പ്രതിയായ ഫസില്‍ രാജേഷിനെ കാണാനെത്തി. വീടാക്രമിച്ച് കെവിനെയും അനീഷിനെയും തട്ടിക്കൊണ്ടുപോയ കാര്യം പറഞ്ഞിരുന്നു. ഇതേക്കുറിച്ച് രാജേഷ് നല്‍കിയ മൊഴി മാറ്റിപ്പറയണമെന്നാവശ്യപ്പെട്ടായിരുന്നു മര്‍ദനം.
പ്രതികളായ വിഷ്ണു, ഷാനു, നിഷാദ്, ടിറ്റു, റെമീസ്, ഷിനു , ഷെഫിന്‍, ഫസില്‍ എന്നിവരെ രാജേഷ് തിരിച്ചറിയുകയും ചെയ്തു. കെവിന്റേത് ദുരഭിമാനക്കൊലയെന്ന പ്രോസിക്യൂഷന്‍ വാദത്തിന് ബലം നല്‍കുന്ന രേഖയുടെ ആധികാരികതയിലാണ് തഹസില്‍ദാര്‍ വ്യക്തത നല്‍കിയത്. അതേസമയം, വിസ്താരത്തിനിടെ കേസിലെ ഏഴ് സാക്ഷികള്‍ പ്രതികള്‍ക്കനുകൂലമായി മൊഴി മാറ്റിയിരുന്നു.
കൂറുമാറിയ ഈ സാക്ഷികള്‍ക്കെതിരേ നിയമനടപടി വേണമെന്ന് പ്രോസിക്യൂഷന്‍ കോടതിയില്‍ ആവശ്യപ്പെടും.