പാലക്കാട്: അട്ടപ്പാടി ഗൂളിക്കടവില്‍ പച്ചക്കറി വ്യാപാരിയെ വെടിവെച്ച കേസില്‍ രണ്ടുപേര്‍ അറസ്റ്റില്‍. അഗളി നെല്ലിപ്പതി സ്വദേശികളായ ഫെര്‍ണാണ്ടസ് ജോയ്(39), ജിനേഷ് എന്ന കുട്ടായി (39) എന്നിവരെയാണ് അഗളി സി.ഐ സുനില്‍ പുളിക്കലിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.

ഗൂളിക്കടവില്‍ പച്ചക്കറി കച്ചവടം നടത്തി വന്നിരുന്ന ഉദയനെയാണ് കഴിഞ്ഞ ഏപ്രില്‍ ഒന്നിന് രാത്രി മൂന്നുപേരടങ്ങിയ സംഘം തടഞ്ഞ് നിര്‍ത്തി വെടിവച്ചത്. കാലിന് വെടിയേറ്റ ഉദയന്‍ ചികിത്സയിലായിരുന്നു.

കോയമ്പത്തൂരിലേക്ക് പച്ചക്കറി എടുക്കാനായി പോകുമ്പോള്‍ ഉദയന്റെ കയ്യിലുള്ള പണം തട്ടിയെടുക്കാനുള്ള ഉദ്ദേശത്തോടെയാണ് പ്രതികള്‍ വാഹനം തടഞ്ഞു നിര്‍ത്തി വെടി വച്ചതെന്ന് പൊലിസ് പറഞ്ഞു. മുമ്പ് രണ്ടുതവണയും പ്രതികള്‍ ഉദയനില്‍ നിന്ന് പണം തട്ടിയെടുക്കാന്‍ ശ്രമിച്ചെങ്കിലും വിജയിച്ചിരുന്നില്ല.
ദീര്‍ഘകാലമായി ഉദയനില്‍ നിന്ന് പണം തട്ടിയെടുക്കാനുള്ള ശ്രമങ്ങള്‍ പ്രതികള്‍ നടത്തി വരികയായിരുന്നു.

ഫോണ്‍കാള്‍ ലിസ്റ്റും മറ്റും കേന്ദ്രീകരിച്ച് നടത്തിയ അന്വേഷണത്തിലാണ് പ്രതികള്‍ വലയിലായത്.