ചേളാരി: എസ്.എം.എഫ് സംസ്ഥാന കമ്മിറ്റിക്ക് കീഴില്‍ നടന്നുവരുന്ന വിവിധ കര്‍മ പദ്ധതികളുടെ വിപുലമായ നടത്തിപ്പിന് വേണ്ടി ഡിജിറ്റല്‍ ക്ലാസ്‌റൂം തുടങ്ങാന്‍ സുന്നി മഹല്ല് ഫെഡറേഷന്‍ സംസ്ഥാന പ്രവര്‍ത്തക സമിതി യോഗം തീരുമാനിച്ചു. കോവിഡ് 19 ന്റെ പശ്ചാത്തലത്തില്‍ താല്‍കാലികമായി നിറുത്തിവെച്ചിരുന്ന എസ്.എം.എഫ് പ്രീമാരിറ്റല്‍ കോഴ്‌സ്, പരാന്റിങ് കോഴ്‌സ് ഓണ്‍ലൈന്‍ വഴി സ്വദേശത്തും വിദേശത്തുമുള്ള യുവതീ യുവാക്കള്‍ക്ക് പങ്കെടുക്കുന്നതിന് ആപ്ലിക്കേഷന്‍ തുടങ്ങാനും തീരുമാനിച്ചു. 2021 ജനുവരി മുതല്‍ ജൂണ്‍ വരെയുള്ള കാലയളവില്‍ എസ്.എം.ഫിന്റെയും ജംഇയ്യത്തുല്‍ ഖുത്വബാഇന്റെയും ജില്ലാ, മേഖല,പഞ്ചായത്ത് കമ്മിറ്റികള്‍ പുനഃസംഘടിപ്പിക്കാനും യോഗം തീരുമാനിച്ചു. സമസ്ത മീലാദ് കാംപയിന്റെ ഭാഗമായി എസ്.എം.എഫ് എല്ലാ മഹല്ലുകളിലും മീലാദ് ജല്‍സ സംഘടിപ്പിക്കും. ശറഫുദ്ദീന്‍ വെണ്‍മേനാടിന് തൃശൂര്‍ എസ്.എം.എഫ് ജില്ലാ പ്രസിഡന്റിന്റെ ചുമതല നല്‍കി.

വിവിധ സബ് കമ്മിറ്റികള്‍ക്ക് യോഗത്തില്‍ രൂപം നല്‍കി. പുനഃസംഘടനാ തിരഞ്ഞെടുപ്പ് സമിതി: പിണങ്ങോട് അബൂബക്കര്‍ (ചെയര്‍മാന്‍), അബ്ദുസ്സമദ് പൂക്കോട്ടൂര്‍ (കണ്‍വീനര്‍).  അദാലത്ത് സമിതി: എം.സി മായിന്‍ ഹാജി (ചെയര്‍മാന്‍), സലാം ഫൈസി മുക്കം (കണ്‍വീനര്‍). അതിജീവനം പദ്ധതി: ഉമര്‍ ഫൈസി മുക്കം (ചെയര്‍മാന്‍), സി.ടി അബ്ദുല്‍ഖാദര്‍ തൃക്കരിപ്പൂര്‍ (കണ്‍വീനര്‍). 

യോഗത്തില്‍ പ്രസിഡന്റ് പാണക്കാട് സയ്യിദ് ഹൈദറലി ശിഹാബ് തങ്ങള്‍ അധ്യക്ഷനായി. സമസ്ത കേരള ജംഇയ്യത്തുല്‍ ഉലമാ ജന. സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ ഉല്‍ഘാടനം ചെയ്തു. 

ഡോ. ബഹാഉദ്ദീന്‍ മുഹമ്മദ് നദ്‌വി കൂരിയാട്, ഹംസ മുസ്‌ലിയാര്‍ വയനാട്, കെ. ഉമര്‍ ഫൈസി മുക്കം, പി.സി ഇബ്‌റാഹീം ഹാജി, സലാം ഫൈസി മുക്കം, കെ.എം കുട്ടി എടക്കുളം, ഹംസ ബിന്‍ ജമാല്‍ റംലി, കെ.കെ ഇബ്‌റാഹീം ഹാജി, മഅ്മൂന്‍ ഹുദവി എന്നിവര്‍ സംസാരിച്ചു. യു. മുഹമ്മദ് ശാഫി ഹാജി സ്വാഗതവും എ.കെ ആലിപ്പറമ്പ് നന്ദിയും പറഞ്ഞു.