ലണ്ടന്‍: ലോകകപ്പ് അടുക്കുംതോറും ഇംഗ്ലണ്ട് കൂടുതല്‍ അപകടകാരികളായി മാറുകയാണ്. ഇത്തവണ കിരീട ഫേവറിറ്റുകളില്‍ മുന്‍പില്‍ നില്‍ക്കുന്ന ടീമാണ് ഇംഗ്ലണ്ട്. പാകിസ്താനെതിരായ ഏകദിന പരമ്പരയില്‍ നാലില്‍ നാലും വിജയിച്ച് ഇംഗ്ലണ്ട് കരുത്തുകാട്ടിയിരുന്നു. എല്ലാ മത്സരത്തിലും 300 ല്‍ അധികം റണ്‍സ് നേടിയ ഇംഗ്ലണ്ട് ഇത്തവണ മറ്റു ടീമുകള്‍ക്ക് പേടി സ്വപ്നമായി മാറിയിരിക്കുകയാണ്.

ലോകകപ്പിന് എട്ടുനാള്‍ ബാക്കിനില്‍ക്കെ ഇംഗ്ലണ്ട് അവസാന ടീം ലിസ്റ്റ് ഇന്നലെ പുറത്തുവിട്ടു. ആതിഥേയരായ ഇംഗ്ലണ്ട് 15 അംഗ ടീമില്‍ യുവ പേസ് സെന്‍സേഷന്‍ ജോഫ്ര ആര്‍ച്ചറെയും ഉള്‍പ്പെടുത്തിയാണ് ടീം ലിസ്റ്റ് പുറത്തുവിട്ടത്. നേരത്തേ പ്രഖ്യാപിച്ച ഇംഗ്ലണ്ടിന്റെ സാധ്യതാ ടീമില്‍ ആര്‍ച്ചര്‍ക്കു ഇടം ലഭിച്ചിരുന്നില്ല.

ഇതു വലിയ വിമര്‍ശനങ്ങള്‍ക്കും ഇടയാക്കിയിരുന്നു. എന്നാല്‍ പാകിസ്താനെതിരേ അടുത്തിടെ നടന്ന ഏകദിന പരമ്പരയിലെ മികച്ച പ്രകടനത്തെ തുടര്‍ന്ന് ആര്‍ച്ചറിനെ ലോകകപ്പ് സംഘത്തില്‍ ഉള്‍പ്പെടുത്തുകയായിരുന്നു. ബാര്‍ബഡോസില്‍ ജനിച്ച ആര്‍ച്ചര്‍ ഈ വര്‍ഷം മാര്‍ച്ചിലാണ് ഇംഗ്ലണ്ടിനായി കളിക്കാന്‍ അര്‍ഹത നേടിയത്. കഴിഞ്ഞ മാസം പ്രഖ്യാപിച്ച ടീമിലുണ്ടായിരുന്ന മൂന്നു പേരെ 15 അംഗ സംഘത്തില്‍നിന്ന് ഇംഗ്ലണ്ട് ഒഴിവാക്കി. അലെക്‌സ് ഹെയ്ല്‍സ്, ജോ ഡെന്‍ലി, ഡേവിഡ് വില്ലി എന്നിവര്‍ക്കാണ് സ്ഥാനം നഷ്ടമായത്. നേരത്തെ പാകിസ്താനും മൂന്ന് പേരെ ഒഴിവാക്കി പുതിയ ലോകകപ്പ് ടീമിനെ പ്രഖ്യാപിച്ചിരുന്നു. ആര്‍ച്ചറിനൊപ്പം ലിയാം ഡോസന്‍, ജെയിംസ് വിന്‍സ് എന്നിവര്‍ തിരിച്ചെത്തി. 24 കാരനായ ആര്‍ച്ചര്‍ പാകിസ്താനെതിരേ നടന്ന പരമ്പരയിലൂടെയാണ് ഏകദിനത്തില്‍ അരങ്ങേറിയത്. രണ്ടു മത്സരങ്ങളില്‍നിന്ന് രണ്ടു വിക്കറ്റുകളാണ് പേസര്‍ നേടിയത്. ലോകകപ്പിനു മുന്‍പ് ശനിയാഴ്ച നിലവിലെ ലോക ചാംപ്യന്മാരായ ആസ്‌ത്രേലിയയുമായി ഇംഗ്ലണ്ട് സന്നാഹ മത്സരത്തില്‍ ഏറ്റുമുട്ടും.

ഇയോന്‍ മോര്‍ഗന്‍ (ക്യാപ്റ്റന്‍), മോയിന്‍ അലി, ജോഫ്ര ആര്‍ച്ചര്‍, ജോണി ബൈര്‍‌സ്റ്റോ, ജോസ് ബട്‌ലര്‍, ടോം കറന്‍, ലിയാം ഡോസെന്‍, ലിയാം പ്ലങ്കെറ്റ്, ആദില്‍ റഷീദ്, ജോ റൂട്ട്, ജാസണ്‍ റോയ്, ബെന്‍ സ്‌റ്റോക്‌സ്, ജെയിംസ് വിന്‍സ്, ക്രിസ് വോക്‌സ്, മാര്‍ക്ക് വുഡ്.