കോഴിക്കോട്: അക്രമി സംഘത്തിന്റെ വെട്ടേറ്റ് ചികിത്സയിലുള്ള വടകരയിലെ സ്വതന്ത്ര സ്ഥാനാര്‍ഥിയും മുന്‍ സി.പി.എം കൗണ്‍സിലറുമായിരുന്ന സി.ഒ.ടി നസീറിനെ സി.പി.എം കണ്ണൂര്‍ ജില്ലാ സെക്രട്ടറി എം.വി ജയരാജന്‍ സന്ദര്‍ശിച്ചു. ഇന്നലെ രാവിലെ കോഴിക്കോട് ബേബി മെമ്മോറിയല്‍ ആശുപത്രിയില്‍ എത്തിയാണ് ജയരാജന്‍ നസീറിനെ കണ്ടത്.

നസീറിനെ ആക്രമിച്ച സംഭവത്തില്‍ നിഷ്പക്ഷ അന്വേഷണം വേണമെന്ന് എം.വി ജയരാജന്‍ ആവശ്യപ്പെട്ടു. കുറ്റക്കാര്‍ ആരായാലും നിയമത്തിന്റെ മുന്‍പില്‍ കൊണ്ടുവരണം.
ആക്രമണത്തില്‍ പാര്‍ട്ടിക്ക് പങ്കില്ലെന്നും അദ്ദേഹം മാധ്യമ പ്രവര്‍ത്തകരോട് പറഞ്ഞു. കഴിഞ്ഞ ദിവസം വടകരയിലെ എല്‍.ഡി.എഫ് സ്ഥാനാര്‍ഥി പി. ജയരാജനും സി.ഒ.ടി നസീറിനെ ആശുപത്രിയില്‍ സന്ദര്‍ശിച്ചിരുന്നു.